Shwétsiye hökümiti adiljan abdulhékimning panahliqini qobul qildi

Bu yil 34 yashqa kirgen adiljan abdulhékim, 11 - séntebir térrorluq weqesidin kéyin afghanistan teripidin amérika eskerlirige ötküzüp bérilip,güentanamo herbiy türmisige qamalghan Uyghurlarning biri idi, u 2006 - yili güentanamodiki yene töt neper Uyghur bilen birlikte albaniyige yerleshtürülgen.

2007 - Yili 11 - ayda shiwétsiyige kishilik hoqoq yighinigha qatniship üchün kélip turup qalghan we shwétsiye hökümitidin siyasiy panahliq tiligen idi. Uning panahliq telipi ilgiri bir nechche qétim shwétsiye da'irilirining ret qilishigha uchrap kelgen.

Bu qétim adiljanning panahliqining qobul qilinishi güentanamodiki Uyghurlarning bashqa bir dölet teripidin qobul qilinishidiki yéngi bir sehipe hésablinidu.

Birleshme agéntliqining bügünki xewiride körsitishiche, amérika dölet mudapi'e ministiri robért geyts bügün, güentanamo türmisi taqalghandin kéyin, tutqunlarning qoyup bérilish mesilisi üstide toxtalghanda, güentanamoda turuwatqan derhal qoyup bérishke tégishlik 17 neper Uyghur heqqide mexsus toxtilip ularning peqet bir qismining amérikigha yerleshtürülüshi mumkinlikini ilgiri sürgen. Halbuki amérikigha qoyup bérilidighan Uyghurlarning éniq sanini tilgha almighan.

Amérika da'iriliri güentanamodiki Uyghur tutqunlar düshmen jengchisi emes dep aqlan'ghandin kéyin, ularning amérika tupriqigha qoyup bérilmigen haldimu hergiz xitaygha qayturup bérilmeydighanliqini tekitlep, üchinchi bir döletning ularni qobul qilishini izdep kelmekte.