Erkin asiya radi'osi muxbiri shöhret hoshur 2012-yilliq nyu-york féstiwalida yene bir altun médal aldi

Radi'omiz Uyghur bölümi muxbiri shöhret hoshurning 2011-yili 28-dékabir “Xoten mokuyla weqesi” heqqidiki “Ana we balilarning erkinlik sadasi” namliq in'glizche xewiri 2012-yilliq nyu-york féstiwalida altun médalgha érishti.
Muxbirimiz méhriban
2012.06.19

2011-Yili 28-dékabir xitay saqchiliri chégradin chiqip kétishke urun'ghanliqi ilgiri sürülgen bir qisim Uyghurlarni oqqa tutup, arisida ikki ayalni öz ichige alghan 7 Uyghurni étip öltürgen we balilarni yarilandurghan idi.

Xitay da'iriliri weqeni atalmish térrorchilargha artishqa urun'ghan bolsimu, weqening heqiqiy mahiyiti radi'omiz teripidin xelq'ara jama'etchilikke ashkarilan'ghandin kéyin, jim bolghan idi.

Nyu-york féstiwali axbarat saheside her yili bir qétim ötküzülidighan xelq'araliq musabiqe. Bu yilliq nyu-york féstiwaligha 30 din artuq dölettiki 200 din artuq axbarat agéntliqining eserliri qatnashturulghan. Shöhret hoshur ependining “Ana we balilarning erkinlik sadasi” namliq programmisi, bultur ereb dunyasida yüz bergen misir tehrir meydani inqilabi, liwiye weqesi qatarliqlar bilen birlikte féstiwalgha qatnashturulghan eng yaxshi eser, dep bahalan'ghan.

18-Iyun nyu-yorkta ötküzülgen mukapat tarqitish murasimigha muxbirimiz shöhret hoshurmu qatnashti. Uning bildürüshiche, yighin bashqurghuchisi “Ana we balilarning erkinlik sadasi” namliq eserning altun mukapatqa érishish sewebi heqqide toxtilip: bu xewerde eyni chaghda xitay metbu'atlirida “Xoten mokuyla yézisida saqchilar térrorchilardin 4 ni öltürüp, 4 nepirini yarilandurup, 4 nepirini qolgha aldi” dep élan qilin'ghan yalghan xewerning heqiqiy mahiyiti ashkarilinip, xitay saqchiliri teripidin étip öltürülgen atalmish “Térrorchilar” ning emeliyette 2 nepirining ayal ikenliki, yarilan'ghan balilarning ichide birining téxi emdila yette yashqa kirgen bala ikenlikidek heqiqet ashkariliwétilgenliki programmining qimmitini namayan qildi, dégen.

Bu qétimqi musabiqide yene radi'omiz koriye bölümidin jung minnoh, won xélé, jinsé'o lé qatarliq muxbirlarning eserlirimu tallan'ghan eserler mukapatqa érishti.

Muxbirimiz shöhret hoshur 2009-yildiki nyu-york féstiwalida erkin asiya radi'osi Uyghur bölümi üchün tunji altun médalni alghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.