Süriye, amérika qatarliq 5 döletni térrorluqni qollidi dep eyiblidi

Nöwette b d t omumi yighinigha qatnishiwatqan süriye tashqi ishlar ministiri walid mu'ellim bügünki sözide, amérika, fransiye, qatar, se'udi erebistan we türkiye qatarliq besh döletni “Süriyining ichidiki térrorchilarni qutratti we qollidi” dep eyibligen.

Muxbirimiz shöhret hoshur
2012-10-01

Mu'ellim sözide, mezkur döletlerning süriyidiki atalmish térrorchilargha qoral we iqtisad jehettin yardem qiliwatqanliqini we bu arqiliq süriyidiki beshar esad hökümitini aghduruwetmekchi boluwatqanliqini bayan qilghan. Buningdin awwal b d t bash katipi ban kimun süriye hökümitini zorawanliqtin waz kechtürüsh üchün, öz xelqige rehimsizlik qilmasliqqa chaqirghan idi. Süriye tashqi ishlar ministiri yuqiriqi sözliridin kéyin b d t bash katipi ban kimun bilenmu körüshken.

Süriye xelqi ereb baharining tesiride namayish ötküzüp beshar esad hökümitini texttin chüshüshke chaqirghan. Beshar esad bolsa, xelqning bu démokratik telipige qoral arqiliq jawab qayturup kelmekte we özige qarshi öktichi küchlerni térrorluq bilen, öktichi küchlerni qollighanlarni térrorluqni qollash bilen eyiblep kelmekte.