Сүрийилик өктичиләр дуняни русийигә қарши намайишқа чақирди

Сүрийилик өктичиләр баянат елан қилип, сүрийә хәлқиниң достлирини русийигә қарши тинчлиқ намайиши өткүзүшкә вә бу арқилиқ русийиниң сүрийә һөкүмитини қоллиғанлиқини әйибләшкә чақирди.
Мухбиримиз ирадә
2012-06-12
Share

Дүшәнбә күни ахшам елан қилинған баянатта, өктичиләр сүрийә хәлқигә дост барлиқ дөләтләрни бирла пәйттә йәни чаршәнбә күни чүштин кейин саәт бирдә өз дөләтлиридики русийә әлчиликлири алдида намайиш өткүзүшкә чақириқ қилған. Баянатта русийә бәшәр әсәдниң қатиллиқ һәрикәтлирини қоллаш вә қоғдаш билән әйибләнгән.

Бүгүн сүрийидики өктичи күчләр мәркәзләшкән хаффә шәһири һөкүмәт күчлири тәрипидин бомбардиман қилинған. Б д т вә сүрийә хәлқигә дост дөләтләр хаффәдә йеңи бир қирғинчилиқниң мәйданға келишидин җиддий әндишә қилмақта.

Б б с ниң хәвәр қилишичә, бирләшкән дөләтләр тәшкилати тәрипидин сүрийигә әвәтилгән көзәткүчи һәйити әһвал тәкшүрүш үчүн һаффәгә кетиватқанда уларниң шәһәргә кириши тосалғуға учриған. Қайта йолида улар олтурған машиниға оқ чиқирилған. Б д т тинчлиқ қисимлириниң башлиқи бүгүн нюйоркта қилған сөзидә сүрийә қисимлириниң хаффәдин қайтиватқан б д т һәйитигә қәстән һуҗум қилғанлиқини ейтқан.

Сүрийидики бу тоқунушларниң "ички уруш" қа айлинип кетиватқанлиқи сүрийиниң дәрһал тинчишини арзу қиливатқан дөләтләрни җиддийләштүрмәктә. Алаһидә әлчи кофи аннаниң хаффадики һуҗумлардин кейин дипломатийилик паалийәтлириниң салмиқини ашурған. Әмма мәсилидики ачқучлуқ дөләт русийә болса йәнә өз пикридә чиң турмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт