Xitay süriyige alahide hey'et ewetidighanliqini bildürdi

Xitayning ottura sherq mesililirige alaqidar alahide hey'iti charshenbe küni süriyide ziyarette bolmaqchi. Xitay da'iriliri ziyaretning süriye hökümitini siyasiy islahat élip bérishqa chaqiriq qilishni meqset qilidighanliqini bildürdi.
Muxbirimiz irade
2011-10-25
Share

Yéqinda birleshken döletler teshkilati süriyige jaza yürgüzüsh heqqidiki qarar layihisini awazgha qoyghanda, xitay we rusiye qarshi awaz bérishi bilen qarar ishqa ashmighan idi.

Xitay tashqi ishlar ministirliqining bayanatchisi jyang yü bügünki bayanatida, ottura sherq mesililiri alahide elchisi wu sikéning süriyide hökümet emeldarliri bilen bir qatar uchrishishlarni élip baridighanliqini bildürüp: biz yenila mesilini tinchliq bilen hel qilish terepdari, dep eskertken.

Emma süriyide minglighan xelq besher esad qisimlirining basturushi astida ölüwatqan shara'it astida xitay hökümitining b d t' ning jazalash qararini “Mesilini diplomatiye arqiliq hel qilish” ni dégenni kötürüp chiqip, mezkur qararni toxtitip qoyushqa heriket qilishi süriyidiki öktichi xelqning shundaqla xelq'ara jama'etning küchlük naraziliqini qozghimaqta.

Birleshken döletler teshkilatining texmin qilishiche, süriyide öktichi heriketler bashlan'ghan 7 aydin buyan 3000 minggha yéqin kishi ölgen. Süriyilik öktichiler heriket bashlighandin béri 30 minggha yéqin kishining besher esedning türmiliride yétiwatqanliqini, ularning qiyin-qistaqqa éliniwatqanliqini, hetta doxturxanilarningmu qiyin-qistaq merkezlirige aylandurulghanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet