Türkiye b d t gha süriye zémini ichide musapirlar rayoni qurush heqqide bésim ishletti

Türkiye tashqi ishlar ministiri exmet dawut'oghlu b d t gha chaqiriq qilip, süriye zémini ichide musapirlar lagéri qurup, süriye musapirlirining dawamliq türkiyige éqip kirishining aldini élishni telep qilghan.
Muxbirimiz erkin
2012-08-29
Share

Türkiye da'irilirining ashkarilishiche, nöwette türkiyige éqip kirgen süriyilik musapirlarning sani 80 mingdin éship ketken. Dawut'oghlu charshenbe küni enqerede ötküzülgen axbarat élan qilish yighinida eskertip: biz b d t ning musapirlarni süriye zémini ichide orunlashturushini, eger mumkin bolsa, musapirlargha süriye ichide lagér qurushini ümid qilimiz, dégen. Dawut'oghluning ashkarilishiche, u b d t musapirlar aliy komissari antoni'o gutérrés we b d t ning yardem ishlirigha mes'ul emeldari waléréy amos bilen bu mesile heqqide sözleshken.

B d t ning seyshenbe küni ilgiri sürüshiche, eger süriyidiki urush dawamliq éghirlashsa, türkiyige éqip kiridighan musapirlar dawamliq köpiyip, 200 minggha yétishi mumkin. Dawut'oghlu, nechche yüz ming kishilik musapirlar éqimigha duch kelgende, héchqandaq bir dölettiki ichki toqunush uning ichki ishi bolmaydighanliqini, buning xeterlik xelq'ara mesilige aylinidighanliqini bildürgen. U bu sözlerni türkiyidiki bezi öktichi partiye -guruhlar we shexsler dawut'oghluning tashqi siyasitini tenqidlep, uning süriye mesiliside xatalashqanliqini, süriyidiki öktichi küchlerni qollap, türkiyini patqaqqa patturup qoyghanliqini tenqid qiliwatqan mezgilde qilghan.

Lékin, dawut'oghlu bu xil tenqidlerni izchil ret qilip keldi. Türkiye, süriye zémini ichide biterep rayon qurup, öktichi küchlerni bashir esedke qarashliq qoralliq küchlerning hujumidin qoghdash pikrige izchil mayilliqini bildürüp kelgen. Yéqinda amérika dölet ishlar ministiri klinton türkiyini ziyaret qilip, uning bilen her xil éhtimalliqlarni muzakire qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet