Tajikistan yéngi yilni özbék gazisiz kütüwalidu

Tajikistanning “Asiya - plus” agéntliqi tajikistan hökümet menbeliridin bu uchurni éniqlighan bolup, özbékistan bilen tajikistan gaz mesiliside pütüshelmigen hemde özbékistan terep néme sewebtin tajikistanni gaz bilen teminleshni toxtishish qararigha kelgenlikini chüshendürmigen.

Özbékistan 2012 - yili tajikistan'gha her ming kubmétiri 300 dollardin 145 milyon kubmétir tebi'iy gaz bérishke maqul bolghan. Bu qarardin kéyin tajikistan bash ministiri özbékistan'gha télégramma ewetip, weziyetni ongshashni telep qilghan.

Buningdin ilgiri özbékistan xitay bilen 10 milyard dollarliq tebi'iy gaz kélishimi tüzgendin kéyin tajikistanni tebi'iy gaz bilen teminleshni pütünley toxtitidighanliqini bildürgen idi. Netijide tajikistan éghir ehwalda qélip, 130 karxana yéqilghu mesilisini kömür arqiliq hel qilishqa almashturghan.

Bu yil 9 - ayda rusiye prézidénti putin tajikistanni ziyaret qilip, bu dölettiki herbiy bazisini 30 yil uzartish hemde su éléktr istansilirini qurushqa pütüshken idi. Tajikistan rusiye bilen birliship, amu deryasida su toghanlirini sélish arqiliq özbékistan'gha su qiyinchliqi keltürüp chiqirishi mumkin iken. Tashkent buningdin nahayiti bi'aram bolmaqta.