Xitay hökümiti 2013-yili Uyghur élining tebi'iy bayliqlirini échish sür'itini ashurdi

Yéqinda ürümchide échilghan zor qurulush türlirini békitish yighinida Uyghur élining tebi'iy gaz, kömür we shuningdek bashqa tebi'iy bayliqlirini échish pilanliri xitaydiki bir qanche zor énérgiye shirkitige ötküzüp bérilgen. Asiya kindiki gézitining xewiridin qarighanda, ili rayonining kömürdin gaz ishlepchiqirish qurulushi dölet derijilik qurulush türige kirgüzülgen bolup, bu qurulushni chingxu'a énérgiye guruhi shirkiti öz üstige alghan.

Bu tür boyiche, ili rayonidiki 5.5 Milyard kub métir kömür gazgha aylandurulidiken. Eger qurulush pütken teqdirde uning yiligha 12 milyard som qimmet yaritidighanliqi bildürülgen.

Buningdin sirt xitayning datang, shénxu'a, jungmiy qatarliq zor énérgiye shirketlirimu Uyghur élining bashqa rayonliridiki kömür kanlarni échish hoquqini qoligha alghan.

Xitay hökümiti “Shinjang xizmiti” yighinidin kéyin Uyghur élining tebi'iy bayliqlirini échish sür'itini ashurup, xitaydiki chong karxanilarning mutleq köp qismini Uyghur élige yerleshtürgen idi. Emma közetküchiler, Uyghur élidiki bu xil tebi'iy bayliqni pilansiz, qalaymiqan échish dolqunining ékologiyige we rayon xelqining turmushigha zor qiyinchiliqlarni élip kélidighanliqini agahlandurmaqta.