Xitay da'iriliri Uyghur éligha téximu köp “Térrorluqqa qarshi turush” qismi orunlashturidighanliqini bildürdi

Xitayning “Yershari waqti” géziti jüme küni élan qilghan bir maqalide xitay j x ministiri ming jyenjuning sözini neqil keltürüp, uning “Shinjang” ning muqimliqi junggoning omumi bixeterliki we pütünlüki üchün intayin muhim, dégenlikini ilgiri sürgen.

Maqalide ashkarilishiche, ming jyenju Uyghur éligha téximu köp “Térrorluqqa qarshi turush” qisimlirining ewetilishi mumkinlikini tekitligen.

Xitay hökümiti xoten “Nawagh weqesi” we qeshqer “Yéngi bazar weqeliri” din kéyin, yuqiriqi ikki rayondiki amanliq küchlirini köpeytip, Uyghurlarning üstidiki nazaretni kücheytken idi.

Xitay qeshqer “Yéngi bazar weqesi” ni pilanlighan atalmish “Térrorchilar” rehbirining pakistanda terbiye alghanliqini ilgiri sürgen bolsimu, lékin analizchi we mutexessisler buning bir yerlik qarshiliq körsitish herikiti ikenlikini we buning nöwettiki xenzularni yölep, Uyghurlarni siyasiy, iqtisadi, ijtima'iy turmushning her qaysi saheliridin chetke qéqishtek bir tereplimilik siyasetke qarshi naraziliqtin kélip chiqqanliqini ilgiri sürgen idi.

Ming jyenju Uyghur éligha yötkeydighan qisimlarning sani, ularning qaysi rayonlargha orunlashturulidighanliqigha da'ir tepsiliy ehwallarni ashkarilimighan.