خىتاينىڭ شىنجاڭدىكى ھۆكۈمەت دائىرىلىرى بۇ ھەرىكەتنى، ئىسيانچىلارنى، تېررورچىلارنى، رادىكال ئىسلامچىلارنى باستۇرىدىغان ھەرىكەت دەپ چۈشەندۈردى. بۇ، خىتاينىڭ خەن مىللىتى بىلەن مەدەنىيىتى، دىنى، تىلى، تارىخىي ئەنئەنىلىرى تامامەن ئوخشىمايدىغان ئوتتۇرا ئاسىيادىكى تۈركىي خەلقلەرنىڭ بىرى بولغان ئۇيغۇرلارغا قاراتقان باستۇرۇش ھەرىكىتى.
گېرمانىيىدىكى دۇنيا ئۇيغۇر قۇرۇلتىيىنىڭ قارىشىچە، خىتاينىڭ بۇ باستۇرۇش ھەرىكىتى ئۇيغۇرلارنىڭ غەزەپ-نەپرىتىنى قوزغاشتىن ئۆزگە ئاقىۋەت پەيدا قىلمايدۇ.
خوڭكوڭ ئۇچۇر ۋاسىتىلىرىنىڭ تەھلىل قىلىشىچە، خىتاي يېقىندا، خوتەن، قەشقەرلەردە نارازىلىق ئىپادىلىگەن ئۇيغۇرلارنى قانۇنى رەسمىيەتسىز ھالدا ئېتىپ تاشلاپ، پۈتۈن ئۇيغۇرلارنىڭ نەپرىتىنى قوزغاپ قويغانلىقىدىن خۇدۈكلىنىپ ۋە 9-ئاينىڭ بېشىدا ئۆتكۈزىدىغان ياۋرو-ئاسىيا يەرمەنكىسىنى، شۇنداقلا 10-ئاينىڭ 1-كۈنىدىكى خىتاينىڭ دۆلەت بايرىمىنى تىنچ ئۆتكۈزۈۋېلىش ئۈچۈن ئۇيغۇرلارغا ئالدىن مۇشت تەڭلەپ قوپتى.