Тәйвән, хитайниң 'бәзи кишиләр уйғурларни қоллап, гавшюңниң саяһәт ишлириға тәсир йәткүзди' дегән баянатини тәнқид қилди

Тәйвән даирилири баянат елан қилип, хитайниң гавшюңдики кишиләр тибәт вә уйғур "бөлгүнчиләр" билән бир сәптә туруп, өзиниң наданлиқини намайән қилғанлиқи сәвәби хитай саяһәтчилириниң гавшюңға бармиғанлиқиға даир сөзлирини тәнқид қилди.
Мухбиримиз әркин
2009.10.16

Тәйвән чоң қурулуқ ишлири комитетиниң баянатчиси ләй шинйүән түнүгүн елан қилған баянатида, хитайниң тәйвән ишлар ишханиси баянатчиси фән личиңниң сөзлирини тәнқидләп, "бу сөзләр фән личиңниң тәйвән демократийисигә болған чүшәнчисиниң наһайити йүзәки икәнликини көрситиду. Униң сөзи тәйвән хәлқиниң көңлигә азар бәргәнлик" дегән.

Гавшюң шәһири уйғур рәһбири рабийә қадир ханимниң һаятини тема қилған "муһәббәтниң 10 шәрти" намлиқ һөҗҗәтлик филимни 10 - айдики гавшюң хәлқара кино феситивалида қоюшни қарар қилған иди. Бу қарар хитай даирилириниң ғәзипини қозғап, чоң қуруқлуқтидики саяһәт ширкәтлирини гавшюңға саяһәтчи апармаслиққа агаһландурған.
 
Фән личиң "гавшюң шәһиридики күчләрниң тибәт вә уйғур мустәққилиқини қоллап, җуңгониң нигизлик мәнпәәтигә зиян салидиған бөлгүнчиләр билән бир сәптә туруши, җуңго саяһәтчилириниң наразилиқини қозғиши нормал" дегән иди.

Гавшюң учур идарисиниң мәсули шу лимиң, хитайниң саяһәтчиләрни сиясий мәқсәткә йетиштики козур қилип қоллиниватқанлиқини тәнқидләп, "тәйвән демократийә вә кишилик һоқуқни муһим дәп қарайду. Мана бу һөкүмәтниң гавшюң филим фестивалиға арилашмаслиқидики сәвәбдур" дегән.

Рабийә ханим һәққидики һөҗҗәтлик филим җүмә күни гавшюң хәлқара кино фестивалида тамашибинларға көрситилди.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.