Muhajirettiki tibetler daramsalada daghdughiliq murasim ötküzüp, özige ot qoyup ölgen tibetlik yashni depne qildi

Jamfél yéshining depne murasimi daramsaladiki suglaxang ibadetxanisida ötküzülgen idi. Bu yil 27 yashliq jamfél yéshi ötken düshenbe küni hindistan paytexti yéngi déhlida xitay re'isi xu jintawgha qarshi ötküzülgen bir namayishta özige ot qoyup bérip, dunyada zor ghulghula qozghighan. Éghir yarilinip yéngi déhlidiki bir doxturxanigha yatquzulghan jamfél yéshi charshenbe küni jan üzgen.

Eger sichüende yene ikki tibet rahibining özige ot qoyghanliqi rast bolsa, yéqinqi 4-5 kün ichide 4 kishi özige ot qoyghan bolidu. Jamfél yéshi özige ot qoyghan düshenbe küni sichüendiki kirti ibadetxanisining 20 yashliq yene bir rahibi özige ot qoyup, xitaygha naraziliq bildürgen idi.

Bu del xitay re'isi xu jintaw yéngi déhlini ziyaret qilip, braziliye, rusiye, jenubiy afriqa, hindistan qatarliq dunyada eng téz tereqqiy qiliwatqan 5 dölet bashliqlirining yighinigha qatnishiwatqan mezgilde yüz bergen.

Xu jintaw charshenbe yéngi déhligha yétip barghanda hindistandiki tibetlerning küchlük naraziliq namayishigha duch kelgen idi. Bu xil namayish jüme küni yene dawam qilghan. Fransiye axbarat agéntliqining ilgiri sürüshiche tibetler shu küni xu jintaw yéngi déhlida chüshken méhmanxana sirtida namayish qilghan bolup, hindistan saqchiliri namayishchi tibetlerdin 5 kishini tutqun qilghan.