Чиңхәйдики тибәтләрниң хитай тилини омумлаштурушқа қарши наразилиқ һәрикити башқа җайлардики тибәтлик оқуғучиларға туташқан

Әркин тибәт һәрикити тәшкилати, ребкоңда башланған намайишниң ғәрбий чиңхәйдики қошна наһийиләргә тутишип, шигортаң, чабча, таво наһийилиридә нәччә йүз кишилик, һәтта бәзи наһийиләрдә нәччә миң кишилик намайиш елип берилғанлиқини билдүргән. Шуниң билән биргә, раст - ялғанлиқи дәлилләнмигән бәзи учурларда намайишниң бейҗиң милләтләр университетидики тибәтлик оқуғучиларға арисиға тарқилип, тибәт оқуғучилириниң мәктәп қорасида 200 - 300 кишилик намайиш елип барғанлиқи илгири сүрүлгән.

Чиңхәй өлкилик парткомниң орган гезити өткән ай өлкилик партком секретари чяң вейниң сөзини нәқил кәлтүрүп елан қилған бир хәвиридә, өлкилик партком секретариниң чиңхәйдики мәктәпләрдә оқу - оқутуш ишлирини бирла тилда йилға қоюшни тәрғип қилғанлиқи илгири сүрүлгән иди. Чяң вейниң сөзи чиңхәйдики тибәтләрдә әндишә қозғап, тибәт тилини қоғдаш намайишиниң йүз беришигә сәвәб болған иди.

Йәрлик кишиләрниң радиомизға ашкарилишичә, даириләр хуаңнән тибәт аптоном областидики мәктәпләрдә тибәт оқуғучилириға әдәбияттин башқа барлиқ дәрсликләрниң хитай тилида өтүлидиғанлиқини уқтурған. Нәтиҗидә бу тибәт оқуғучилири вә оқутқучилириниң наразилиқини қозғиған.

Хәвәрләргә қариғанда, чиңхәй өлкилик партком секретари чяң вей пәйшәнбә күни хуаңнән тибәт аптоном областиға берип, ата - ана вә оқуғучилар вәкиллирини қобул қилған вә мунасивәтлик даириләрдин оқуғучи һәм ата - аниларниң пикиригә һөрмәт қилишни тәләп қилған.