Chingxeydiki tibetlerning xitay tilini omumlashturushqa qarshi naraziliq herikiti bashqa jaylardiki tibetlik oqughuchilargha tutashqan

Erkin tibet herikiti teshkilati, rébkongda bashlan'ghan namayishning gherbiy chingxeydiki qoshna nahiyilerge tutiship, shigortang, chabcha, tawo nahiyiliride nechche yüz kishilik, hetta bezi nahiyilerde nechche ming kishilik namayish élip bérilghanliqini bildürgen. Shuning bilen birge, rast - yalghanliqi delillenmigen bezi uchurlarda namayishning béyjing milletler uniwérsitétidiki tibetlik oqughuchilargha arisigha tarqilip, tibet oqughuchilirining mektep qorasida 200 - 300 kishilik namayish élip barghanliqi ilgiri sürülgen.

Chingxey ölkilik partkomning organ géziti ötken ay ölkilik partkom sékrétari chyang wéyning sözini neqil keltürüp élan qilghan bir xewiride, ölkilik partkom sékrétarining chingxeydiki mekteplerde oqu - oqutush ishlirini birla tilda yilgha qoyushni terghip qilghanliqi ilgiri sürülgen idi. Chyang wéyning sözi chingxeydiki tibetlerde endishe qozghap, tibet tilini qoghdash namayishining yüz bérishige seweb bolghan idi.

Yerlik kishilerning radi'omizgha ashkarilishiche, da'iriler xu'angnen tibet aptonom oblastidiki mekteplerde tibet oqughuchilirigha edebiyattin bashqa barliq dersliklerning xitay tilida ötülidighanliqini uqturghan. Netijide bu tibet oqughuchiliri we oqutquchilirining naraziliqini qozghighan.

Xewerlerge qarighanda, chingxey ölkilik partkom sékrétari chyang wéy peyshenbe küni xu'angnen tibet aptonom oblastigha bérip, ata - ana we oqughuchilar wekillirini qobul qilghan we munasiwetlik da'irilerdin oqughuchi hem ata - anilarning pikirige hörmet qilishni telep qilghan.