1951 ‏- Yildiki tibet - xitay kélishimini imzalap, xitaygha ötüp ketken tibet söhbet wekili öldi

Shinxu'a agéntliqining charshenbe küni xewer qilishiche, tibet hökümiti we tibet rohani dahiysi dalay lamagha wekaliten 1950 - yildiki tibet - xitay kélishimige imza qoyghan tibet wekili, tibet armiyisining sabiq qomandani we dalay lama ichki kabinétining sabiq ezasi napoy nawang jigmé ölgen.

Muxbirimiz erkin
2009-12-23

Xitayda "aféy awang jingméy"dégen nam bilen tonulghan napoy nawang jigmé tibetlik bir aqsöngekning oghli bolup, u 1950 ‏- yili tibet milli qisimlirining qomandani idi. Shu yili nawang jigméning qomandanliqidiki tibet milli qisimi tibetning chamdo rayonida xitay armiyisi bilen urushqan. Lékin u jengde meghlup bolup, xitay armiyisige teslim bolghan idi.

U yene 1951‏ - yili tibet wekiller ömikige yétekchilik qilip, béyjing hökümiti bilen tibetning aptonomiye we diniy erkinlik hoquqigha kapaletlik qilishni öz ichige alghan, lékin tibet xitay xelq jumhuriyitining igilik hoquqidiki rayon ikenlikini étirap qilidighan 17 maddiliq kélishimge imza qoyghan.

Mezkur kélishim 1959 ‏- yili lxasada qozghilang partlap, dalay lama hindistan'gha qéchip chiqqandin kéyin bikar qilin'ghan bolsimu, lékin napoy nawang jigmé xitay hökümiti bilen üzlüksiz hemkarliship, xitay merkizi hökümitining herbiy we hökümet qatlimi hem xitay xelq qurultiyida muhim rehbiriy xizmetlerni ötigen. Shinxu'a axbarat agéntliqining xewirige qarighanda u charshenbe küni 99 yéshida ölgen.