Tibet sergerdan hökümiti bash ministiri tibetlerni chaghanni tebriklimeslikke chaqirdi

Tibet teshkilatlirining bildürüshiche, 2009-yildin béri jem'iy 99 neper tibet özini köydürüp, xitayning tibet siyasitige naraziliq bildürgen. Lobsang san'gay mundaq dégen: bu tragédiyilik weziyetni közde tutup, tibetlerdin losar bayrimida normal tebriklesh pa'aliyetlirini ötküzmeslikni telep qilimen.

U, tibetlerni bayramda milliy kiyim-kécheklirini kiyip, özining kimliki we örp adetlirini namayan qilishqa, ibadetxanilarni ziyaret qilip, xeyri-saxawet ishliri bilen shughullinishqa chaqirghan.

Lobsang san'gay mezkur chaqiriqni élan qilishtin sel burun gensuning tibet aptonom oblastidiki bir ibadetxana aldida konchak kyab isimlik 26 yashlardiki bir tibet charwichi özini köydürüp naraziliq bildürgen idi. Fransiye axbarat agéntliqining xewer qilishiche, köyüp éghir yarilan'ghan bu yash ölgen.

Mutleq köpchilik tibetler xitay hökümitini tenqidlep, uning diniy basturush, tibet medeniyitini yoqitish, xitay köchmenlirini tibetke köchürüsh siyasiti yürgüzüwatqanliqini bildürsimu, biraq xitay hökümiti bu jehettiki tenqidlerni ret qilip, tibetlerning diniy erkinliktin behrimen bolup kéliwatqanliqini, tibetning zamaniwilishish we iqtisadi tereqqiyatigha köplep meblegh séliwatqanliqini ilgiri sürüp keldi.