Amérika kéngesh palatasi xitayni tibettiki basturush siyasitige xatime bérishke chaqirdi

Mezkur qarar layihisi buningdin bir qanche kün ilgiri kéngesh palatasining tashqi ishlar komitétida maqullinip, kéngesh palatasi omumi yighinining maqullishigha sunulghan. Qarar layihiside xitay hökümitidin mehbuslarni qoyup bérish, chet'el axbarat wasitilirining tibetke bérip, u yerning weziyitini xewer qilishigha yol qoyush telep qilin'ghan.

Xitay hökümiti qarar layihisini “Junggoning ichki ishlirigha arilashqanliq” dep agahlandurghan bolsimu, biraq qarar layihisi héchqandaq bir ezaning ret qilishqa uchrimay birdek maqullan'ghan.

Kéngesh palatasi qarar layihiside, xitay 2008‏-yildin buyan yolgha qoyup kéliwatqan “Dinni kontrol qilish belgilimilirini emeldin qaldurush” qa we dalay lamaning wekilliri bilen söhbetni eslige keltürüshke chaqirghan. Qarar layihiside xitay hökümitidin yene, xalighanche tutqun qilin'ghan barliq kishilerni qoyup bérish, tinch namayishchilarni qorqutush, ulargha parakendichilik sélish we tutqun qilishni toxtitish telep qilin'ghan.

Qarar lyhiside yene, xitaydin lxasada amérika konsulxanisi échishqa tézrek yol qoyush telep qilinip, béyjing buninggha ruxset qilmighuche, xitayning amérikida yéngi konsulxana échishi testiqlanmaydighanliqini agahlandurghan. Mezkur qarar layihisini otturigha qoyghan kéngesh palata ezaliridin dayan faynstayin: kéngesh palatasi tibet xelqige “Siz öz medeniyitingizni saqlap qélish we diniy ibaditingizni erkin élip bérish üchün küresh qilsingizla biz siz bilen hemkarlishimiz” dégen éniq signalni béridu, dégen.