«ئىمزاسىز» توربۇزارلار خىتاي ھۆكۈمەت تورلىرىغا يەنە ھۇجۇم قىلىدىغانلىقىنى ئېلان قىلدى

بۈگۈن مەزكۇر گۇرۇپپىنىڭ بىر ئەزاسى رويترىس ئاگېنتلىقىغا سۆز قىلىپ ئۆزلىرىنىڭ خىتاينىڭ ھۆكۈمەت تورلىرىغا يەنە داۋاملىق ھۇجۇم قىلىدىغانلىقىنى بايان قىلغان. ئۇ سۆزىدە ھۇجۇمنىڭ مەقسىتىنى خىتايدىكى چىرىكلىكنى پاش قىلىش ۋە كىشىلىك ھوقۇق ۋەزىيىتىنى ئىلگىرى سۈرۈش دەپ كۆرسەتكەن.

نەچچە ۋاقىتتىن بېرى، بىر قىسىم خىتاي توربۇزارلار خەلقئارادىكى كىشىلىك ھوقۇق تەشكىلاتلىرى ۋە شىركەتلەرنىڭ توربەتلىرىگە ھۇجۇم قىلىپ مەزكۇر ئورۇنلارنىڭ پائالىيەتلىرىگە توسقۇنلۇق قىلىپ كەلگەن. خىتاي ھۆكۈمىتى ئۆزلىرىنىڭ بۇ ھۇجۇملار بىلەن ئالاقىسى يوقلۇقىنى، ھەتتا ئۆزلىرىنىڭمۇ توربۇزارلارنىڭ قۇربانى ئىكەنلىكىنى بىلدۈرگەن.

بۈگۈن رويترىسقا پىكىر بايان قىلغان ئىمزاسىز توربۇزارلار گۇرۇپپىسى ئۆزلىرىنىڭ ھەقىقەت ۋە ئادالەت ئۈچۈن كۈرەش قىلىۋاتقانلىقىنى، ئاخىرقى ھېسابتا خىتاينىڭ تور توسۇقلىرىنى بىتچىت قىلىدىغانلىقىنى بايان قىلغان.