Türkiye prézidénti abdulla gul tajikistanni ziyaret qildi

Türkiye prézidénti abdulla gül 28 - may küni Uyghur élining jenubiy qoshnisi tajikistan'gha yétip kélip u yerde üch kün ziyarette boldi. U düshenbe shehiride tajik prézidénti emam eli raxman bilen türkiye - tajikistan hemkarliq munasiwetlirini muzakire qildi.
Muxbirimiz ümidwar
2009-05-31
Share

Perghane agéntliqining yézishiche, 29 - may küni türkiye prézidénti abdulla gül bilen éman eli raxman birleshme bayanat élan qilghan bolup, buningda türkiye bilen tajikistanning siyasiy - iqtisadi, soda we téxnologiye qatarliq köp saheler boyiche hemkarlishidighanliqi ekis ettürülgen.

Xewerlerdin melum bolushiche, ikki prézidént yene merkiziy asiya rayonidiki térrorchiliq, diniy radikalizm we  zeherlik chékimlikke qarshi ortaq küresh qilish mesililirinimu muzakire qilghan bolup, ular bu sahedimu hemkarlishishqa kélishken.

Perghane agéntliqining xewer qilishiche, abdulla gül 2008 - yili türkiye bilen tajikistanning soda qimmitining 500 milyon dollargha yetkenliki, buningdin kéyin soda munasiwitini téximu ashurush lazimliqini körsetken shuningdek türkiyining tajikistanning su zapisining molliqini nezerge élip, uning türlük su éléktir istansilirini qurushigha qatnishishqa teyyar ikenlikini bildürgen.

Nöwette, xitay shirketlirining tajikistanning su éléktir istansilirini qurush ishlirini höddige éliwatqanliqi heqqide xewerler mewjut bolup, tajikistan köp jehetlerdin qurulush qilishqa muhtaj bolmaqta.

29 - May küni abdulla gül bilen emam eli raxman tajikistan  - türkiye soda muhakimisige qatnashqan bolup, bu pa'aliyetke türkiyining 100 din artuq chong karxana we soda xojayinliri kélip qatnashqan. 30 - May küni bolsa abdulla gül tajikistan parlamént re'isi we bash ministiri bilen uchrashqan.

Shangxey guruhidiki tajikistan xitayning ittipaqchisi bolup, ikki dölet térrorchiliq qarshi turush nami astida birleshme herbiy manéwir ötküzüpla qalmastin, belki Uyghur éli bilen tajikistan arisidiki sodining küchiyishigimu ehmiyet bergen.

Tajikistan yene bir tereptin iran we afghanistan bilen paris tillirida sözlishidighan döletler süpitide qoyuq hemkarliqlarda bolsa, yene bir tereptin rusiye bilenmu zich hemkarlashmaqta. Chünki, tajikistan ahalisining 4/1 qisimining rusiyide tirikchiliq qiliwatqanliqi melum.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet