Түркийә милләтчи һәрикәт партийиси вәкиллири үрүмчини зиярәт қилди

Түркийидики шәрқий түркистан паалийәтлирини изчил түрдә актип қоллап келиватқан партийә - гуруһларниң бири болған милләтчи һәрикәт партийисиниң бир вәкилләр өмики үрүмчини зиярәт қилип, үрүмчи даирилири билән сөһбәттә болған.
Мухбиримиз үмидвар
2011.12.25
Share on WhatsApp
Share on WhatsApp

Хитайниң тәңритағ ториниң ашкарилишичә, милләтчи һәрикәт партийисиниң даимий муавин рәиси илдирим түркәш башчилиқидики мәзкур һәйәт 23 - декабир күни ахшими үрүмчидә уйғур аптоном районлуқ коммунистик партийә комитетиниң муавин секретари хәнйоң билән көрүшкән. Хәнйоң түркийә вәкиллиригә уйғур елиниң әһвалини тонуштурғанда ислаһат башланған 30 йил ичидә, болупму үрүмчи вәқәсидин кейин бейҗиңда ечилған мәркәзниң шинҗаң хизмәт йиғинидин кейин зор өзгиришләрниң болғанлиқи, иқтисад гүллинип, хәлқниң хошал - хурам вә хатирҗәм турмуш кәчүриватқанлиқини баян қилған.

Партийә комитетиниң муавин секретари хәнйоң сөзидә йәнә уйғур елиниң хитай билән түркийә арисидики мунасивәтләрдә көврүклүк вә бәлвағлиқ рол ойнаватқанлиқини тәкитлигән.

Мәлумки, хитай коммунист һөкүмити әслидә һечқачан түркләр билән уйғурлар арисидики етник - туғқанчилиқ вә көврүклүк мунасивәтлирини етирап қилмиған болуп, бу нуқтини тәкитлигәнләр пантүркизм қилмиши билән әйибләнгән иди. 5 - Июл вәқәсидә түркийә баш министири тайип әрдоғанниң хитайни қаттиқ әйиблишидин кейин башланған түркийә - хитай йеңи мунасивәтлиридә түркийә тәрәп изчил түрдә уйғурлар билән түркләрниң етник туғқанчилиқ мунасивити вә уйғурларниң икки дөләт мунасивәтлиридики көврүклүк ролини тәкитлигән һәмдә хитай тәрәпму бу нуқтини етирап қилған иди.

19 - Декабир күни хитайға кәлгән мәзкур түркийә зиярәт вә тәкшүрүш өмики

23 - Декабирдин 27 - декабирғичә уйғур әлидә зиярәт вә тәкшүрүшләрдә болидикән.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.