Türkiye insan heqliri teshkilati xitay hökümitini insaniyetke qarshi turush jinayiti bilen eyiblep sotqa erz sundi

Radi'omizning türkiyide turushluq muxbirining igilishige qarighanda, mezkur teshkilat xitay üstidin istanbul sotigha erz sunushtin ilgiri axbarat élan qilish yighini chaqirghan bolup, teshkilatning istanbul tarmiqi rehbiri kök demir " xitay hökümiti Uyghurlar üstidin qirghinchiliq élip bardi, shunga biz istanbuldiki jumhuriyetlik aliy sotining xitay hökümitining qirghinchiliq jinayiti üstidin eyiblesh élip bérishini telep qilimiz ," dégen.

Témir muxbirlargha bergen bayanatida yene "xitayning sherqiy türkistandiki élip barghan qilmishi insaniy qirghinchiliq, xitay hökümiti yérim esirdin buyan Uyghurlarni irqiy jehettin assimilyatsiye qilishtin yenimu ilgirilep irqiy qirghinchiliq qilish basquchigha ötti. Uyghur türkliri uzaq mezgildin buyan xitayning bésimi astida yashimaqta, bolupmu 5 - iyul ürümchi weqesidin buyan xitay da'iriliri namayishchi Uyghurlargha oq chiqardi, türlük herbiy qorallarni ishlitip basturdi, emma xelq'ara jem'iyet buninggha süküt bilen qarap turmaqta . Biz türkiye sotining qanuniy küchige tayinip xitayning jinayiti üstidin sot échishini ümid qilimiz," dégen.

Témir bayanatining axirida yene, insan heqlirige ishinidighan insanlar hayatining büyüklükige ishinidighan türkiyining her qaysi ölkilirining xitay emeldarliri üstidin sotqa erz sunushini teshebbus qilghan.

Bu yil 5 - ayda ispaniye aliy soti xitay kompartiyisining Uyghur élige qoyghan sékrétari wang léchu'enni insaniyet qarshi jinayet bilen eyibligen idi.