Америка уйғур бирләшмиси рабийә қадир ханимға һиндистанға кириш визиси берилмигәнлик хәвирини рәт қилди

Дүшәнбә күни америка уйғур бирләшмиси баянат елан қилип, уйғур демократик һәрикити рәһбири рабийә қадир ханимниң һиндистан виза илтимасиниң рәт болғанлиқ хәвириниң чин әмәсликини испатлап, рабийә ханимниң һечқачан һиндистанға виза илтимаси сунмиғанлиқини көрсәтти.
Мухбиримиз гүлчеһрә
2009-07-28
Share

Буниң алдида, телеграф гезити 25 - июл күни, йеңи деһлиниң хитай һөкүмитиниң бесимиға учрап уйғур миллий һәрикити рәһбири рабийә қадир ханимға һиндистанға кириш визиси бәрмигәнликини хәвәр қилған иди.

Мәзкур хәвәрдә хитай даирилириниң рабийә қадирниң һиндистанға берип тибәт диний даһийси далай лама билән учришишидин әнсиригәнлики,һиндистанниң уйғур һәм тибәт мустәқилчилириниң һиндистан земинида туруп хитайға қарши паалийәтләр билән шуғуллинишиға йол қоймаслиқини тәләп қилғанлиқи көрситилгән.

Һалбуки телеграф гезитидә мәзкур хәвәр мәнбәси ениқ көрситилмигән болуп, бүгүн мәзкур асассиз хәвәр америка уйғур бирләшмиси тәрипидин очуқ рәт қилинди.

Уйғур даваси, шундақла уйғурлар дуня мәтбуатида мәркәзлик орун тутуватқан һәм етрап қилиниватқан ушбу пәйттә, хитай һөкүмити өз тәшвиқатида бир тәрәптин "рабийә қадирға дуняда һечким көз қирини салмайду" дегәндәк сәпсәтиләрни тарқитиватқан болса, йәнә бир тәрәптин уйғур миллий һәрикити рәһбири рабийә қадир ханимниң зияритигә ишик ачқан дөләтләргә дипломатик йоллар билән бесим ишлитип, униң зиярәт паалийәтлиригә давамлиқ түрдә тосқунлуқ қилишқа һәрикәт қилип кәлмәктә. Һалбуки хитай һөкүмитиниң бу урунушлири мувәппәқийәтсиз болуп кәлди.

Бүгүн японийә һөкүмити хитайниң шу хил бесимиға писәнт қилмай рабийә қадир ханимниң зияритигә иккинчи қетим ишик ачти.

5 - Июл үрүмчи вәқәсидин кейин, дуняниң уйғурлар һәм уйғур давасиға болған һесдашлиқи йәниму күчәйгән болуп,йеқиндин буян йәнә нурғун дөләтләр, хәлқаралиқ даңлиқ ахбарат органлири һәм аммиви тәшкилатларниң уйғур миллий һәрикити рәһбири рабийә қадир ханимни мәхсус зиярәт һәм сөһбәтләргә рәсмий түрдә тәклип қиливатқанлиқи мәлум. 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт