Ху җинтав хитайниң пакистан билән “3 хил күчләр”гә қарши бихәтәрлик диалоги вә һәмкарлиқни күчәйтиш арзусини билдүрди

Франсийә ахбарат агентлиқиниң хәвиридин мәлум болушичә, ху җинтав гиланиға “җуңго пакистан билән бихәтәрлик диалоги вә һәмкарлиқни күчәйтип, 3 хил күчләргә бирликтә қарши турушни арзу қилиду” дегән.

Гиланиниң бу қетимқи хитай сәпири америка алаһидә һәрикәт қисимлириниң әлқаидә рәһбири бин ладенни униң исламабад әтрапидики қоналғусида өлтүрүп, пакистанни интайин осал әһвалға чүшүрүп қойған бир вақитта елип берилған.

Пакистанниң нәччә йиллардин бери бин ладенни йошурғанлиқ еһтимали америкида җиддий гуман қозғиған иди. Гиланиниң бин ладен вәқәсидин кейинла опул-топул хитайни зиярәт қилиши көзәткүчиләрниң диққитини қозғап, бу пакистанниң һазирқи осал әһвалдин хитайниң ярдимидә қутулмақчи болуватқанлиқиниң бешарити, дәп қаралған иди.

Пакистан дөләт мудапиә министири әхмәт мухтәр ниң ашкарилишичә, хитай пакистанға сетип бәрмәкчи болған уруш айропиланлириниң тапшуруш вақтини тезлишқа мақул болған.

Әхмәт мухтәр, хитайниң мушу 6 ай ичидә пакистанға 50 данә уруш айропилани тапшуридиғанлиқини билдүргән.

Гилани пәйшәнбә күни бейҗиң университетида нутуқ сөзләп, “пакистан-хитай шерикчилики вақит,хәлқара вә район вәзийитидики өзгиришләрниң синиқидин өткәнлики” ни тәкитлигән.

Бәзи анализчилар, пакистанниң хитайға яхшичақ болуш үчүн униң уйғурларға қарши туруш тоғрисидики техиму көп тәләплирини қобул қилиш еһтимали барлиқини илгири сүрмәктә.