Xitay da'iriliri ürümchidiki bir qisim mehellilerde amanliqni kücheytishke pul ajratqan

Ürümchi shehiri da'iriliri yéqinda mezkur sheherning merkizi rayonliridiki bir qisim mehellilerge pul ajritip, amanliqni kücheytidighanliqini élan qilghan.
Muxbirimiz erkin
2012.06.29

“Shinjang géziti” ning xewer qilishiche, ürümchi sheherlik partkom yéqinda muqimliq xizmet yighini chaqirip, ürümchining merkizi rayonliridiki amanliqi nachar jaylarni yéngi mehellige aylandurushni, her bir yéngi mehellige bir milyon yüendin pul ajritishni qarar qilghan. Biraq bu heqtiki xewerlerde yéngi mehellige aylandurulidighan amanliqi nachar bu jaylarning qaysi rayonlarni körsitidighanliqi tilgha élinmighan.

21-Iyun échilghan mezkur yighinda ürümchi sheherlik partkom sékrétari ju xeylun tekitlep: bir mehellige bir saqchi mes'ul bolush, bir mehellige köp saqchi mes'ul bolush, endizisini emeliyleshtürüshni telep qilghan. Xitay da'iriliri bu ayning bashliri xotende bir yer asti diniy mektepke hujum qilip, 12 oqughuchi yarilan'ghandin kéyin, amanliq tedbirlirini kücheytip atalmish“Qanunsiz diniy mekteplerge zerbe bérish” herikiti bashlighan. Biraq közetküchiler, xitay da'irilirining amanliq tedbiri “5-Iyul weqesi” ning 3 yilliq xatire künide weqe yüz bérishtin saqlinishqa qaritilghanliqi, ürümchi sheherlik partkomning “Amanliqi nachar mehelliler” ni tüzeshke pul ajritishi, omumi amanliq tedbirlirining bir qismi ikenlikini ilgiri sürmekte.

Dunya Uyghur qurultiyi dilshat rishit, sheherlik partkomning qararigha inkas qayturup, buning ürümchidiki Uyghurlarni ilgirilep kontrol qilish we nazaret qilishqa qaritilghanliqini bildürdi. Sheherlik partkomning 21-iyundiki yighinida, mewqeni nöwettiki mesililerni hel qilishqa qaritip, 25‏ mehellide ish basturush orni qurush telep qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.