Вашингтонда үрүмчи вәқәсиниң бир йиллиқи һәққидә юмилақ үстәл сөһбити өткүзүлди

Бүгүн америка пайтәхти вашингтонда "дәрдимизни аңлайдиған адәм барму, 2009 - йилидики үрүмчи вәқәсидин садалар " мавзулуқ юмилақ үстәл сөһбити өткүзүлди.
Мухбиримиз ирадә
2010-07-01
Share

Мәзкур йиғинни америкидики демократийини илгири сүрүш фонди, дуня уйғур қурултийи вә америка уйғур бирләшмиси бирликтә уюштурған.

Йиғинға кишилик һоқуқни көзитиш тәшкилати асия ишлири мудири софи ричардсон, чегрисиз мухбирлар тәшкилатиниң вашингтон ишханиси мудири клосилд ликоз, америка дөләт мәҗлисигә қарашлиқ там ләнтус кишилик һоқуқ комитетиниң демократлар вәкиллири мудири һанс һогрифи вә америка дөләт мәҗлиси хитай ишлири иҗраийә комитетиниң адвокатлиқ хизмити директори кара абрамсон ханим қатарлиқ муһим шәхс вә орунлар қатнашти.

Йиғинда 5 - июл вәқәсиниң сәвәблири вә нәтиҗиси тоғрисида доклат берилгән вә бу һәқтә муназириләр елип берилди. Йиғинниң биринчи бөликидә, 5 - июл үрүмчи вәқәсиниң икки гуваһчиси 5 - июл үрүмчи намайишиниң бастурулуш җәряни вә 7 - июлдики хитай пуқралириниң уйғурларға һуҗум қилиш вәқәлири вә өз бешидин өткүзгән вә көргән вәқәлирини баян қилди.

Гуваһчи уйғурларниң сөзлири интайин тәсирлик болди. Һәтта бир гуваһчи өзиниң бешидин өткүзгән вәқәлири вә уйғурлар йолуққан паҗиәләрни баян қилиш җәрянида көз йешини туталмиди. Бу кишиниң баянлири йиғин әһлиниму интайин тәсирләндүрди.

Йиғинниң иккинчи бөликидә, рабийә қадир ханимниң мәзкур йиғин үчүн тәйярлиған нутқи оқуп өтүлди. Нутиқини д у қ муавин рәиси өмәр қанат сунди.

Йиғинда йәнә, америка демократийини илгири сүрүш фонди җәмийитиниң президенти карл гершмин сөз қилди. У сөзидә уйғурларниң кишилик һоқуқ, демократийә һәрикәтлиригә иқтисадий җәһәттин ярдәм беришни тохтатмайдиғанлиқини, һәтта мумкин болса ярдәм бериш соммисини көпәйтидиғанлиқини билдүрди.

Йиғинға һәр саһә кишилиридин болуп 70- 80 әтрапида киши қатнашти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт