Xitay “Yawro-asiya yermenkisi” de bixeterlik tedbirlirini kücheytip, ürümchi hawa boshluqini kontrol qildi

Xitay hökümiti 1‏-séntebir bashlinidighan “Yawro-asiya yermenkisi” harpisida bixeterlik tedbirlirini mislisiz kücheytti.
Muxbirimiz erkin
2011.08.31

Ürümchi hawa boshluqi kontrol astigha élinip, leglek, kepter qatarliqlarni uchurush cheklendi. Uchidighan matorluq qorallarni kontrol qilish tedbiri yene korla, sanji, turpan, shixenze qatarliq sheherlerde yolgha qoyulghan.

Ürümchi kochilirigha toluq qorallan'ghan amanliq küchlirini orunlashturup, charlash kücheytilgen. Xelq meydanigha nurghun saqchi aptomobillirining toxtitip qoyulghanliqi we charlash élip bériwatqan qoralliq saqchi qisimliri muxbirlarning diqqitini qozghighan.

Chet'el axbarat wasitilirining bu heqtiki xewerliride béyjing, shangxey we xitayning bashqa sheherliridin ürümchige uchidighan yoluchilargha qarita tekshürüsh kücheytilip, uchush seperlirining kéchikishini keltürüp chiqarghanliqi bildürüldi.

 Béyjing qatarliq sheherlerdiki ayrodromlarda Uyghur élige uchidighan yoluchilar ayrim tekshürülüp, yoluchilardin ayighini sélish, belwéghini chiqirish telep qilin'ghan we yoluchilarning qolidiki yük-taqa, nerse kérekler qayta-qayta tekshürülmekte iken.

Ürümchi “Yawro-asiya yermenkisi” 1‏-séntebir bashlinip 5‏-séntebirge qeder dawam qilidu. Közetküchiler xitay hökümitining mezkur yermenke arqiliq Uyghur musteqilliq herikitige qarshi diplomatik üstünlükke érishmekchi boluwatqanliqini ilgiri sürmekte.

Xewerlerdin melum bolushiche, yermenkige xitayning mu'awin bash ministiri li kéchyang, pakistan prézidénti zerdari, qirghizistan prézidénti otanbayiwa qatarliq shexsler qatnishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.