Үрүмчи җамаәт хәвпсизлик идариси паспорт ишләшни асанлаштуридиғанлиқини елан қилди

Үрүмчи җамаәт хәвпсизлик идариси чәтәлгә чиқишни башқуруш башқармиси бундин кейин чәтәлгә чиқмақчи болған үрүмчи шәһәр аһалилириниң паспорт ишләш рәсмийәтлирини асанлаштуридиғанлиқини елан қилди.
Мухбиримиз ирадә
2010.10.28

Шинҗаң аманлиқ торидики хәвәрдә "үрүмчи җамаәт хәвпсизлик идариси бундин кейин оқуш, тиҗарәт вә өлүм - йетим әһваллири сәвәблик чәтәлгә чиқмақчи болғанлар, әгәр җиддий илтимас қилған тәқдирдә паспортини тез сүрәттә беҗирип бериду" дәп уқтуруш қилинған.
 
Хитай даирилири үрүмчи вәқәсидин кейин уйғур районида бир мәһәл паспорт ишләшни тохтитип қойған, бәзи уйғурларниң паспортлирини йиғивалған вә әслидики рәсмийәтләрни техиму қийинлаштурувәткән иди.

Радиомиз игилигән мәлуматлардин уйғурлар пәқәт паспорт елиш үчүн илтимас қилиш җәдвилини елиш үчүнла таки мәһәллә комитетидин тартип район вә шәһәр дәриҗилик органларғичә йол маңидиғанлиқи, һәтта диний ишлар идарисидин испат хети алидиғанлиқи мәлум болған иди.
 
Әмма үрүмчи җамаәт хәвпсизлик идариси бүгүн тарқатқан учурида, бундин кейин чәтәлгә чиқиш үчүн илтимас қилиш җәрянини аддийлаштурғанлиқини, илтимас қилғучи пәқәт үрүмчи шәһәр аһалиси болса вә чәтәлгә чиқиш үчүн нормал бир сәвәби болсила дәрһал илтимас қилиш җәдвили алалайдиғанлиқини ейтқан.

Дуня уйғур қурултейиниң баянатчиси дилшат ришит әпәнди болса, үрүмчи җамаәт хәвпсизлик идарисиниң үрүмчидики хитай пуқралирини көздә тутуватқанлиқини, уйғурларниң паспорт елишиниң йәнила охшаш қийинчилиққа учраватқанлиқини, уйғурларниң әркин саяһәт қилиш, туғқан йоқлаш вә чәтәлләрдә тиҗарәт қилиш һоқуқиниң тосқунлуққа учраватқанлиқини билдүрди.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.