Ürümchi yuqiri soti '5 ‏- iyul' erizdarlirining hökümge naraziliq erzini ret qildi

Uyghur aptonom rayoni yuqiri sot mehkimisi ürümchi sheherlik ottura sot mehkimisi teripidin yéqinda "5 ‏- iyul weqesi"ge chétilip jazalan'ghan 21 kishining hökümge narazi bolup qilghan erzini ret qilip, eslidiki hökümni küchke ige, dep jakarlidi.

2009.10.30

Ürümchi sheherlik ottura sot mehkimisi bu ayning bashliri arqa - arqidin 2 qétim sot échip, "5 - iyul weqesi"de "jinayet" sadir qilghanliqini ilgiri sürgen 21 kishi üstidin höküm élan qilip, 12 kishige ölüm jazasi bergen. Qalghanlirini muddetsiz we oxshimighan derijide muddetlik qamaq jazasigha höküm qilghan idi. Sotlan'ghanlarning 19 nepiri Uyghur, 2 nepiri xitay idi.

Ürümchidiki bu sot xelq'ara kishilik hoquq teshkilatlirining shiddetlik tenqidige uchrapla qalmay, béyjingdiki xitay kishilik hoquq adwokatliriningmu tenqidige uchrighan. Ürümchidiki sotni tenqid qilghuchilar sotning siyasiylashturulghanliqini, xelq'ara edliye ölchemlirige xilapliq qilinipla qalmay,xitayning özidiki qanun - belgilimilergimu xilapliq qilin'ghanliqini ilgiri sürgen.

Yuqiri sot, "erizdarlarning hökümge narazi bolushtiki sewebi put tirep turalmaydu" dep qarighan. Lékin xitay metbu'atlirining bu heqtiki xewerliride, erizdarlarning hökümge narazi bolushtiki sewebi, ularning özini aqlash ehwaligha da'ir konkrét mesililer tilgha élinmighan. Xitay qanunigha asasen yuqiri sotning qarari xitay ali sot mehkimisi tedbiqlap testiqlighandin kéyin küchke ige bolidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.