Хитай, үрүмчидә интернет вә хәлқаралиқ телефон мулазимитигә қаратқан қамалини һазирғичә бошатмиди

Хитай даирилири 5 - июлдин башлап үрүмчидә қамал қилинған бир қисим тор алақә һәм телефон линийилири мулазимитигә қаратқан контроллуқиниң бир қисмини 28 - июл күни ечивәткәнликини хәвәр қилди.
Мухбиримиз гүлчеһрә
2009-07-28
Share

Сәйшәнбә күни хитай һөкүмитиниң уйғур елидики һөкүмәт ахбарат торидин тәңритағ тори ечиветилди. 5 - Июл үрүмчидә вәқә йүз бәргән һаман, хитай һөкүмити үрүмчини мәркәз қилип уйғур елиниң телефон алақә вә тор мулазимитини пүтүнләй үзүп ташлиған иди. Һөкүмәт вә партком башқурушидики тәңритағ тори 23 күндин буян тунҗи ечилған тор бәт һесаблиниду.

Әмма үрүмчидин игилигән учурлардин мәлум болушичә, нөвәттә банка һесабати, оқуғучи һәм ишчи хизмәтчи қобул қилиш, күндилик һаварайи учури игиләш қатарлиқ аммиви мулазимәт тор бекәтлири түрләр бойичә тар даиридә мәшғулат қилишиға ечилған болсиму,уйғур елиниң һәр қандақ йеридә уйғур тилидики һәр қандақ тор бәтләр, хәлқаралиқ тор бәтләр ечилмиғандин сирт, чәтәлләр билән болған телефон алақиси һазирға қәдәр ечиветилмигән. Шу сәвәбтин истансимиз мухбирлириниң уйғур елидин телефон яки башқа васитиләр арқилиқ әмәлий әһвалларни игилишиму изчил тосалғуға учрап кәлмәктә.

Хитай даирилири интернет вә телефон мулазимитини қамал қилишиға "бөлгүнчи күчләрниң тор һәм телефон алақилиридин пайдилинип кетишиниң алдини елиш" дегән баһанини көрситиватқан болсиму, хәлқаралиқ ахбарат һәм инсан һәқлири көзәтчилири, әмәлийәттә болса хитайниң бастуруш һәрикәтлирини дунядин йошурушни мәқсәт қиливатқанлиқини тәнқид қилмақта. 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт