Үрүмчи вәқәсиниң қурбанлири ашкариланмақта
Мухбиримиз ирадә
2009.10.23
2009.10.23
Бүгүн радиомизниң ишәнчлик йәрдин алған хәвиригә қариғанда, үрүмчидики вәзийәт йәнила интайин җиддий болуп, сентәбирниң бешида иккинчи қетимлиқ намайишқа чиққан хитайлар чоң типтики тәшвиқат аптомобиллириға йоған канайларни бекитип " уйғурлар йоқалсун, уйғурларни шинҗаңдин қоғлап чиқирайли," дәп давраң салған.
Намайиш күни үрүмчи теливизийиси 6 уйғурниң өлгәнлики вә 37 уйғурниң яридар болғанлиқини хәвәр қилған. Сақчи даирилири болса өлгән уйғурниң 30 дин ашидиғанлиқини билдүргән.
Ишәнчлик инкастин мәлум болушичә, 4 - сентәбир күни чүштин кейин саәт 5 әтрапида 30 яшлардики абләт исимлик бир уйғур достлуқ йолида хитайлар тәрипидин уруп өлтүрүветилгән. Өлгүчиниң җәсити 9 - сентәбир күни аилиси тәрипидин испатланған болсиму, әмма уларға қайтуруп берилмигән.
8 - Июл күни шәһәрлик қатнаш идарисиниң хизмәтчиси, бу йил 27 яшқа киргән илһам әтигәндә ишқа кетиватқанда аптобоситики 3 венҗулуқ хитай тәрипидин уруп өлтүрүлгән. Хитай шопур әһвални көргән болсиму буни тосимиған. Әмма у вәқә һәққидә испат бәргән.
13 - Сентәбир күни бир уйғур момай өзи чиққан таксиниң шопури тәрипидин өлтүрүлгән. Таксичи қолға елинған болсиму, әмма чарә көрүлмигән.
Мәлум болушичә, үрүмчи вәқәсидин кейин 60 тин артуқ уйғур сақчи хитай даирилириниң наһәқ сиясәт елип бериватқанлиқидин шикайәт қилип ишидин истипа бәргән икән.
Техи йеқиндила кишилик һоқуқни күзитиш тәшкилати бир доклат тәйярлап үрүмчи вәқәси җәрянида из - дерәксиз ғайип болған 43 кишиниң исимликини ениқлап чиққанлиқини елан қилған вә бу санни: "муз теғиниң су йүзигә чиқип қалған кичиккинә бир парчиси," дәп ипадә қилған иди.