Хитай, уйғур елиниң сирт билән интернет, телефон алақисини үзүп қойғили төт ай болди

Франсийә агентлиқи бүгүн хәлқарани 'хитай һөкүмити уйғур аптоном райониниң дуня билән болған интернет, телефон алақисини үзүп ташлап, бу аптоном райондики хәлқни дунядин айрип қоюватқили төт ай болуп қалди' дәп хәвәрләндүрди.
Мухбиримиз вәли
2009.10.24

Хәвәрдә баян қилинишичә, уйғур аптоном районидики меһманханилар вә сода дуканлириниң йәрлик даирә ичидә қилидиған алақисиму, һазир һәдисила 'қатнаш җиддийлики' гә дуч келиватиду.

Бу уйғур аптоном райондики йәрлик аһалиларниң инкас қилишичә, үрүмчи аһалилири 5‏ - июл күни намайиш қилғандин кейин, хитай һөкүмити 'террорчи, бөлгүнчи, дини радикаллар интернет, телефон арқилиқ учур тарқитип вәқә туғдурди' дәп җакарлап, бу райондики шәһәр-базарларниң һәммисидә йәрлик аһалиларниң дуня билән болған елхәт, телефон алақисини пүтүнләй үзүвәткән.

Бу райондики ширкәтләрниң инкас қилишичә, гәрчә хитай һөкүмити уларниң тиҗарәт алақилири үчүн 'йешил қанал' қалдурғанлиқини җакарлиған болсиму, әмма улар бу уйғур аптоном районида елхәт қобул қилалмай яки йоллиялмай туруватиду. Уларниң мунасивәтлик ширкәтләр яки херидарлири билән болған алақиси йүрүшмәйду.

Бир америкилиқ ширкәтчиниң ейтишичә, һазир гәнсудики дүнхуаң, уйғур аптоном райониниң сирт билән алақә қилалиши мумкин болған бирдинбир 'мәккә'си болуп қалған. Әмма бу райондики ширкәтләрниң гәнсу өлкисидики дүнхуаңға берип херидарлири билән яки баш оргини яки тармақлири билән қилалайдиған алақисиму һазир наһайити чәклик болуп қеливатиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.