Хитай үрүмчидә диний китабларға зәрбә беришни давамлаштурмақта

Шинхуа агентлиқиниң хәвиригә қариғанда, 2 - ай киргәндин буян үрүмчи шәһәрлик җамаәт хәвпсизлик идариси үрүмчини мәркәз қилған һалда, диний китабларни йиғип мусадирә қилишни давамлаштурмақта икән.
Мухбиримиз миһрибан
2010-02-10
Share

Хәвәрдин мәлум болушичә, 6 - феврал үрүмчи шәһәрлик җамаәт хәвпсизлик идариси ләнҗудин елип келингән 13 тонна еғирлиқтики диний китабни мусадирә қилған.

Үрүмчи шәһәрлик сақчи даирилириниң билдүрүшичә, бу китабларни ләнҗудин йөткәп кәлгүчи рози исимлик 26 яшлиқ уйғур болуп, у, қәшқәр кона шәһәр наһийисидин икән. Униң билән бирликтә китабларни йөткәп кәлгән йәнә бирәйләнни болса сақчи даирилири тутуш буйруқи чиқарған.

Хитай даирилири һәр хил баһаниләр билән уйғурларниң диний етиқад әркинликини чәкләп зәрбә бериш һәрикитини узундин буян давамлаштуруп келиватқан болуп, дуня уйғур қурултийи вә хәлқара җәмийәт хитайни пуқраларниң диний әркинликини боғуш билән әйибләп кәлмәктә иди.

Дуня уйғур қурултийи баянатчиси дилшат ришит әпәнди зияритимизни қобул қилип, хитай һөкүмитиниң уйғурлар үстидин елип бериватқан қаттиқ бастуруш һәрикитини әйибләйдиғанлиқини билдүрди.

У йәнә, хитай һөкүмитиниң уйғурларниң нормал диний етиқад әркинликини боғуватқанлиқини, хәлқ тәрипидин нәшр қилинған диний китабларни "қанунсиз диний китаблар" дәп мусадирә қиливатқанлиқини қаттиқ әйиблиди вә хәлқарани хитай һөкүмитигә давамлиқ бесим ишлитишкә чақирди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт