Xitay ürümchidiki bashlan'ghuch - ottura mekteplerning amanliq tedbirlirini kücheytti

Xitay hökümiti Uyghur aptonom rayonining merkizi ürümchidiki her qaysi ottura - bashlan'ghuch mektep we balilar baghchilirining amanliqini kücheytip, mektep we balilar baghchilirining kirish - chiqish éghizida cheklen'gen rayon tesis qilghan. Bu heqtiki xewerlerde, da'irilerning mektep we balilar baghchilirining kirish - chiqish éghizigha mexsus saqchi we bixeterlik xadimlirini orunlashturghanliqi ilgiri sürülgen.
Muxbirimiz erkin
2010.05.07

Ürümchi sheher j x idarisi buyruqname chüshürüp, mektep we balilar baghchilirining bixeterlikige tehdit sélish xaraktérlik jiddiy weqe yüz berse, saqchi we bixeterlik xadimlirining " derhal hem keskin bir terep qilishi"ni telep qilghan.

Lékin xewerlerde "derhal hem keskin bir terep qilish" dégenlikning menisi chüshendürülmigen. Xitayda yéqindin béri, bashlan'ghuch mektep we balilar baghchilirigha hujum qilip, adem öltürüsh yaki balilarni zexmilendürüsh weqeliri arqa - arqidin yüz bergen. 28 ‏- April küni jyangsuda bir adem balilar baghchisigha hujum qilip, 28 balini pichaqlap zeximlendürgen idi. Bu xitay da'irilirini ottura, bashlan'ghuch mektep we balilar baghchilirida jiddiy bixeterlik tedbiri élishqa mejbur qilghan idi.

Lékin, ürümchidiki ottura - bashlan'ghuch mektep we balilar baghchilirida yolgha qoyulghan bixeterlik tedbiri, 5" ‏ - iyul weqesi"ning bir yilliq xatire künige yéqinlap kéliwatqanliqi yaki ichkiride yüz bergen bashlan'ghuch mektep oqughuchilirigha hujum qilish weqeliri bilen munasiwetlik ikenliki melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.