Xitay Uyghur élidin chet'elge chiqip ketkenlerning nopusini tekshürüsh heqqide tunji netijisini élan qildi

Xitay da'iriliri bu yil yanwardin bashlap,jama'et xewpsizlik, xelq ishliri we muhajirlar ishliri tarmaqliri birlikte, nopus tekshürüsh bahaniside öymu-öy kirip chet'elge chiqip ketkenler heqqide arxip tüzüsh xizmitini bashlighan idi.
Muxbirimiz gülchéhre
2012.04.12

11-Aprél küni ili oblasti tashqi ishlar ishxanisi tunji bolup bu heqtiki tekshürüsh netijisini élan qildi.

Xitay xelq torining bu heqte bügün tarqatqan xewirige qarighanda, da'irilerning éniqlishidin, ili oblastidin chet'ellerge köchüp chiqip olturaqliship qalghanlarning sani 500 mingdin, bularning ichide weten'ge qaytqan muhajir a'ile tawabi'atliri 200 mingdin ashqanliqi, ili oblasti Uyghur élidiki nuqtiliq muhajirlar yurtigha aylan'ghanliqi melum bolghan.

Xewerge qarighanda, ili tewesidin chet'elge chiqip olturaqliship qalghanlarning 70% tin köpreki ottura asiyada bolup, qalghanliri awstraliye, gérmaniye, fransiye, shwétsiye, kanada we amérika qatarliq döletlerge tarqalghan. Ularning mutleq köp qismi Uyghurlar ikenliki tekitlen'gen.

Xewerdin melum bolushiche, xitay da'iriliri birinchi qedemde chet'ellerge chiqip olturaqlashqanlar heqqide arxip toplash, uningdin kéyinki qedemde weten'ge qaytqan muhajirlarni ittipaqlashturup ularning wetenni tonush tuyghusini kücheytish we chet'elge chiqip ketkenlerni türlük usullar bilen qaytip kélishke righbetlendürüshni meqset qilghan iken.

Ili da'irilirining tarqatqan bu xewiride chet'elge qaysi waqittin bashlap chiqip ketkenlerni asas qilghanliqi yaki millet nisbiti heqqide éniqlima bérilmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.