Уйғурлар мәсилисигә көңүл бөлүп кәлгән илена ханим америка дөләт мәҗлиси ташқи ишлар комитетиниң башлиқлиқиға сайланди

Уйғур вә тибәт хәлқлириниң кишилик һоқуқ вәзийитигә изчил һалда көңүл бөлүп келиватқан парламент әзалиридин җумһурийәтчи илена рос леһтинән ханим америка дөләт мәҗлиси ташқи ишлар комитетиниң башлиқи болуп сайланди. У илгири дөләт мәҗлиси ташқи ишлар комитетиниң әзаси, шундақла флорида шитатидин сайланған парламент әзаси иди.
Мухбиримиз ирадә
2010-11-04
Share

Илена ханим америка дөләт мәҗлисидә хитайниң уйғур вә тибәтләргә йүргүзүватқан сиясити шундақла хитай һөкүмитиниң дуня миқясида елип бериватқан бәзи натоғра паалийәтлириниң тәнқидлигүчиси болуп кәлгән. У, 2008 - йили, тибәттики һәрикәттин кейин америка дөләт мәҗлиси тәрипидин елан қилинған тибәткә даир қарар наһийисиниң қоллиғучиси болуп, әйни чағда америка һөкүмитини тибәтниң пайтәхти лхаса шәһиридә америка консулханиси ечишқа чақирип, һөкүмәттин, бейҗиң һөкүмити америкиниң бу тәлипини қобул қилмиғичә, хитайниң америкида башқа консулханилирини ечишиға рухсәт бәрмәсликини тәләп қилған иди.

Илена ханим йәнә, бу йил авғуст ейида иранға ембарго қоюлуп, бир қисим чәтәл ширкәтлири у йәрдики паалийәтлирини тохтатқандин кейин, хитайниң пурсәттин пайдилинип иран билән енергийә саһәсидики тиҗаритини ашуруватқанлиқини қаттиқ тәнқидлигән һәмдә "хитайға америка йолға қойған имбаргоға пәрва қилмаслиқниң бәдилини төлитишимиз керәк" дегән иди.

Илена ханим уйғурларниң кишилик һоқуқ мәсилисигә изчил көңүл бөлүп кәлгән әрбабларниң бири. Америка дөләт мәҗлисидә уйғурларниң мәсилисигә аит чиқирилған қарар лайиһилири асасән илена ханим қатарлиқларниң қоллиши астида вуҗудқа кәлгән. У 2005 - йили рабийә ханимға рафто кишилик һоқуқ мукапатини тарқитиш мурасимиға өзи бивастә қатнашқан иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт