Хитай уйғур елидә 'пуқраларниң җәмийәт аманлиқини қоғдаш низамнамиси' ни елан қилди

Уйғур районлуқ қанун органлири җәмийәт муқимлиқиға алақидар йеңидин низамнамә чиқирип, җинайәтчиләр билән елишип яриланған пуқраларға қәһриманлиқ шәрипи берилидиғанлиқи һәмдә сәһийә органлириниң бу хилдики кишиләрни шәртсиз давалиши керәкликини көрсәтти.
Мухбиримиз җүмә
2010-01-02
Share

Шинхуа ахбаратида көрситишичә, бу нөвәт тонуштурулған "аптоном районлуқ җәмийәт аманлиқини қоғдаш омумйүзлүк түзәш низамнамиси" уйғур аптоном районлуқ 11 - нөвәтлик хәлқ қурултийи даимий комитети 16 йиғинда мақулланған.

Бу, хитай йәрлик һөкүмәт даирилириниң "5 - июл вәқәси"дин буян чиқарған шу хилдики бир қатар бәлгилимилириниң бир қисимни.

Хәвәрдә көрситишичә, бу низамнамида, әгәр "пуқралар" җәмийәт аманлиқини қоғдаш йолида яки җинайи қилмишларға қарши күрәштә "өлгән болса" дөләт вә аптоном районниң алақидар бәлгилимилиригә асасән "уларға қәһриманлиқ унвани бериш вә аилә тавабиатлириға пенсийә мааши бериш" қатарлиқлар бәлгиләнгән.

Низамнамидә йәнә, әгәр пуқралар җинайи қилмишлар билән елишиш йолида хизмәт вақтини сәрп қилған болса, күтүнүш расхоти бериш, әгәр ярилинип мәҗруһ болған болса, аптоном районлуқ әмгәк тармақлириниң мунасивәтлик бәлгилимилиригә асасән дәриҗә айрип тәминаттин бәһримән қилиш вә сәһийә органлири яриланғучиларни шәртсиз давалаш қатарлиқлар көрситилгән.

Хитайниң йәрлик һөкүмити чаршәнбә күни уйғур елидә йәнә "милләтләр иттипақлиқи қануни"ни мақуллап, милләтләр мунасивитигә зиян салидиған сөз ибариләрни ишләткүчиләрни җинайәтчи сүпитидә җазалайдиғанлиқини бекиткән иди.

Дуня уйғур қурултийи баянатчиси дилшат ришит, 2009 - йили 12 - ай ичидә чиқирилған мәзкур низамларни, уйғур елидә сөз -пикир әркинликиниң техиму еғир дәриҗидә боғулушини кәлтүрүп чиқиридиған вә башқиларниң "аталмиш җинайәтчиләр" билән елишишни сәвәб қилип бигунаһ кишиләрниң җазалиниш хәтирини еғирлаштуридиған низамнамиләр дәп көрсәтти.

У йәнә, 2009 - йил сентәбирдә үрүмчидә йүз бәргәнлики илгири сүрүлгән "йиңнә һуҗуми" вә шуни баһанә қилип хитай пуқралириниң уйғурларға һуҗум қилғанлиқини мисал қилди. У мундақ деди: "бу нөвәт мақулланған 'пуқраларниң җәмийәт аманлиқини қоғдаш низамнамиси' 2009 - йили сентәбирдә йүз бәргән хитай пуқралириниң аталмиш 'һуҗумчилар' ни топлишип урушиға охшаш зораванлиқларни қануни асас билән тәминләйду."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт