Хитай уйғур әмгәк күчлириниң мәркәзлик уйғур ели даирисидә ишләшкә тәшкиллинидиғанлиқини билдүрди

"Шинҗаң" гезитиниң хәвәр қилишичә, йәрлик даириләр хәлқара кишилик һоқуқ органлириниң вә уйғүр тәшкилатлириниң шиддәтлик тәнқидигә учриған уйғур әмгәк күчлирини ичкиригә йөткәп ишлитиш сияситигә өзгәртиш киргүзүп, буниңдин кейин уйғур ешинча әмгәк күчлиригә "аптоном район ичидә вә өзигә йеқин әтраптин иш тепип беришкә йүзлинидиғанлиқи"ни билдүргән.
Мухбиримиз әркин
2010-01-15
Share

Хитай һөкүмити 2004 - йилдин башлап уйғур әмгәк күчлирини ичкиригә йөткәш сияситини йолға қоюп, буниң билән уйғурларниң иқтисади әһвалини яхшилайдиғанлиқини илгири сүргән иди.

Лекин 2009 - йили 6‏ - айниң 26 - күни гүаңдуң шавгүәндә йүз бәргән уйғур ишләмчиләрни өлтүрүш вәқәси вә бу вәқәгә әгишип, үрүмчидә йүз бәргән 5 ‏- июлдики миллий тоқунуш хитайниң бу сияситигә еғир зәрбә бәргән иди.

Уйғур аптоном райони әмгәк күчи байлиқи вә иҗтимаий капаләт назаритиниң диһқан ишләмчиләр хизмитигә мәсул әмәлдари ву йүнхуа , буниңдин кейин йезилардики ешинча әмгәк күчлирини "узун - муддәтлик вә муқим ишқа  орунлаштурушни нишан, аптоном район ичидә ишлитиш билән өзигә йеқин әтраптин иш тепип беришни йөлиниш қилидиғанлиқи"ни тәкитлигән.

Бу һәқтики хәвәрләрдә бу йил уйғур илидә йөткилип ишләйдиған әмгәкчиләр бир милйон 200 миң адәм қетимға, наһийә, шәһәр, йеза - базарларға йөткилип ишләйдиғанларниң 700 миңға йетидиғанлиқини илгири сүргән.

Дуня уйғур қурултийи хитайниң уйғур әмгәк күчлирини ичкиригә йөткәштики ғәризи ассимилиятсийә қилишни мәқсәт қилидиғанлиқини әскәртип, әгәр ассимилиятсийә ғәризи болмиса ,уйғур яшлириға нимишқа йәрлик орунларда хизмәт тепип бәрмәйдиғанлиқини сориған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт