Yéngi yil harpisida Uyghur élida yene öy axturush we tutqun qilish dawam qildi

Melum bir shahidning ashkarilishiche, shu küni héchqandaq bir weqe chiqmighan bolsimu, saqchilar Uyghurlar mehellisidiki bir türküm kishilerni öyliridin tutqun qilip élip mangghan. Muxbirimizning igilishiche yene, yéngi yil harpisida, ghuljida 5 - iyul weqesi xatirilen'gen bir sin'alghu léntisi bayqalghan bolup, bu munasiwet bilen 10 nechche kishi tutqun qilin'ghan.

Xitay saqchiliri 25 - dékabirdin 30 - dékabirgha qeder qeshqer shehiride öy axturush élip bérip qedimiy kitablarni yiqqan we ot qoyghan. Yene xitayche yashinwang torida xewer qilinishiche, saqchilar ürümchide étildaq (yeni pojangza) sétilidighan dukanlargha uxturush chüshürüp, étildaq sétiwalghuchilarni tizimlash, eger chong tiptiki pa'aliyetler üchün köp miqdarda étildaq sétiwalmaqchi bolsa, choqum saqchining testiq qeghizini körüsh telep qilin'ghan.

Xitay saqchiliri bu qétimqi öy axturush we tutqun qilish heriketlirinimu xuddi burunqigha oxshashla, héchqandaq qanuniy resmiyet körsetmestin, zorawanliq bilen élip barghan. Uyghur élida, xitayning, 5 - iyul weqesidin kéyinki tunji yéngi yil harpisini qattiq endishe ichide ötküzgenliki melum bolmaqta.