Xitay da'iriliri Uyghur élide yene bir qisim tor betlirining échilidighanliqini élan qildi

Xewerde mundaq déyilgen: "xelqning intérnétke bolghan telipini qandurush üchün, 5 - féwral sa'et 24 tin bashlap, qollinishchanliqi yuqiri, tor abonitliri yaxshi köridighan shinjang sirtidiki 27 xil tor béti keyni -keynidin cheklik da'iride échilidu".

Xewerde yene, shinxu'a tori munazire bétiningmu échilidighanliqi körsitilgen. Xewerde bu tor betlirining "aptonom rayonning qedemmu - qedem échish prinsipigha asasen" échilidighanliqi tekitlen'gen.

Xewerde, bu nöwet échilidighan tor betlirining tizimliki bérilgen bolup, bularning asasen hökümet igidarchiliqidiki xewer - uchur torliri ikenliki melum.

Xitay 2009 - yilidiki "5 - iyul weqesi"din kéyin, Uyghur élining barliq intérnét alaqisini üzüwetken we xelq'araliq téléfon mulazimitini bikar qilghan idi.

Uyghur élide weqe yüz bérip, aridin yérim yildin köprek waqit ötkendin kéyin, xelq'araliq téléfon alaqisi qismen eslige keltürülgen bolsimu, ayrim hökümet axbarat toridin bashqa barliq intérnét taqaq haletni saqlap kelmekte idi.