Чегрисиз мухбирлар тәшкилати: уйғур дияри дунядин айриветилмәктә

Чегрисиз мухбирлар тәшкилати уйғурларниң пайдилиниши үчүн ечилған уйғурчә, хитайчә вә бәзи инглизчә тор бәтлири үстидин тәкшүрүш елип барған болуп, улар бу һәқтики доклатида мундақ дәйду: нәччә он йиллардин бери пикир әркинлики, диний әркинлики вә иқтисадий әркинлики кәмстилип келиватқан уйғурлар әмди интернет ишлитиштиму кәмситилишкә учримақта. Үрүмчи вәқәси болуп аридин 4 ай өткән бүгүнки күндиму, хитай уйғур диярини дунядин пинһан тутушқа тиришмақта. Биз һәргиз хитайниң "һәммә иш нормалға қайтти" дегән оюниға алданмаслиқимиз керәк. Уйғурлар һазирғичә интернеткә чиқалмайду, қисқа учур язалмайду һәтта телефонму уралмайду.

Доклатта йәнә, ахбарат әркинлики тәшкилатиниң баяниғиму йәр берилгән болуп униңда мундақ дейилгән: хитай даирилириниң өзиниң бу қилмишини ақлаш үчүн "тероррчилар интернет вә қисқа учурдин пайдиланған" дәп көрсәткән баһанисини қобул қилиш мумкин әмәс. Пакистан вә афғанистан һөкүмәт даирилири интернетни террорчилар ишлитивалиду дәп тосап бақтиму? яқ. Хитай даирилири бу йәрдә уйғур дияриниң вәзийити болупму 5 - июл вәқәсиниң һәқиқий йүзигә аит көпләп учурниң сиртқа чиқип кетишидин әнсиригәндәк көрүнүватиду.

Чегрисиз мухбирлар тәшкилати доклатида, даириләрни уйғур дияриниң интернет вә телефон алақлирини дәрһал әслигә кәлтүрүши һәққидә агаһландуриду вә тор бәтләрниң қайтидин ечилиши, бу тор бәтләрни башқуридиғанларниңму әркин һәрикәт қилиш һоқуқи болуши керәкликини тәкитләйду.

Игилинишичә, чегрисиз мухбирлар тәшкилати уйғур дияридики 100 дәк тор бәт үстидин тәкшүрүш елип барған болуп, диярим, шәбнәм вә улиниш қатарлиқ тор бәтләрму буниң ичидә икән. Тәкшүрүш нәтҗисидин мәлум болушичә, интайин аз бир қисим музика вә кино тор бәтлири ечилғанниң сиртида 85 пирсәнттин көп тор бети тамамән тақиветилгән икән.