Béyjinggha kelgen Uyghur erzdarlar arisigha diniy cheklimiler üstidin erz qilghuchilar qoshuldi

Öz kimlikini ashkarilashni xalimighan bireylenning bildürüshiche, xitayning 18-qurultiyi yépilghan birnechche kündin buyan yene bir türküm Uyghur erzdarlar béyjinggha kelgen.
Muxbirimiz méhriban
2012-11-20
Élxet
Pikir
Share
Print

Bu kishining bildürüshiche, bu qétim béyjinggha kelgen Uyghur erzdarlar arisigha ilgirikidek yer dawasi we öy-zémin dewasi qilip kelgen erzdarlardin bashqa, Uyghur rayonida élip bériliwatqan diniy étiqad jehettiki türlük cheklimilerge naraziliqini bildürüsh üchün kelgen Uyghurlarmu qoshulghan.

Yéqindin buyan normal diniy étiqad pa'aliyetliri cheklimige uchrap, hetta Uyghur ayallirining yaghliq artishi, erlerning saqal qoyushighimu cheklime qoyulghanliqini bildürgen bu erzdarlar xitay hökümitidin "Puqralarning qanunda belgilen'gen diniy étiqad erkinlikige hörmet qilinish" ni telep qilidighanliqini bildürgen.

Bu yil kirgendin buyan Uyghurlargha qaritilghan diniy cheklimiler barghanche kücheytilgen bolup, bu ehwal xelq'ara metbu'atlarning diqqitini qozghighan idi. Bolupmu qeshqer we xotendiki bir qisim soda sarayliri, banka we hökümet idarilirige chaplan'ghan, diniy yosunda kiyin'gen, yüzini orighan ayallarni, saqal qoyghan erlerni soda saraylirigha kirgüzmeydighanliqi, ularning mulazimiti béjirilmeydighanliqi heqqidiki uqturushlar hemde bezi nahiyilerde töwen kapaletlik a'ililiklerge bérilidighan yardem puli qatarliqlarda bu a'ililerde diniy tüs alghan kiyim kiygenlerning bolmasliqi shert qilin'ghanliqi qatarliq uqturushlar heqqidiki süretlik xewerler ammiwi tor béketlirige yollinip, Uyghurgha qaritilghan diniy cheklimiler heqqidiki xewerler erkin asiya radi'osi, gérmaniye awazi qatarliq gherb metbu'atliri we türkiye metbu'atlirida bérilgendin kéyin, bu ehwal xelq'arada küchlük inkas qozghighan idi.

Xitay kompartiyisining 18-qurultiyigha qatnishiwatqan qeshqer wilayetlik saqchi idarisining mu'awin bashliqi küresh kenji 13-noyabir küni"Jenubiy junggo seher pochtisi" ning ziyaritini qobul qilghinida, xitay hökümitining Uyghurlargha qaratqan diniy cheklesh siyasetlirini aqlap, Uyghurlarning diniy yosunda kiyinishige chek qoyulmighanliqini bildürgen bolsimu, lékin u bu yil kirgendin buyan qeshqer we xoten qatarliq jaylarda yolgha qoyulghan diniy yosunda kiyin'gen, yüzini orighan ayallarni, saqal qoyghan erlerni soda saraylirigha kirgüzmeydighanliqi, déhqanlargha bérilidighan yardem puli mesiliside diniy étiqad adetlirige cheklime qoyulghanliqi heqqide uqturush qilin'ghanliqi qatarliq ehwallarni tilgha almighan idi.

Toluq bet