Үрүмчи ғәрбий тағ җилғисидики уйғурларни 2-қетим көчүшкә мәҗбурлиши уйғурларни нарази қилмақта

“уйғурбиз” ториниң хәвәр қилишичә, әслидики ямалиқ теғиниң “қарләйлиси” райони дәп аталған мәһәллисидики 1миң 720 аилилик уйғур 2006-йили үрүмчи шәһәрлик һөкүмәтниң “үрүмчидики 3 тағни гүзәлләштүрүш” пилани бойичә, ғәрбий тағ районидики тағ җилғисиға орунлаштурулған. Әйни чағда һөкүмәт даирилири уларға бу районда балилар үчүн мәктәп, йол, мәсчит қатарлиқларни селип беридиғанлиқини вәдә қилған болсиму, лекин һөкүмәт даирилири 4 йилғичә бу вәдисини орунлимиған.

Ғәрбий тағ райониға көчүрүлгәндин кейин, турмуши яхши орунлаштурулмиған бу уйғурларниң наразилиқи әрзлири давамлишиватқан әһвал астида, үрүмчи шәһәрлик һөкүмәт даирилири бу йил 2-айда бу йәрдики аһалиләргә, ғәрбий тағ җилғиси райониниң “чегра район меһманханиси” ға сетилип берилгәнликини уқтурған һәм уларни тағ районидин 2-қетим көчүшкә мәҗбурлиған. Тағ районидики өз кимликини ашкарилашни халимиған уйғурларниң “уйғурбиз” тор бекити мухбириға билдүрүшичә, нөвәттә көчүшкә мәҗбурланған уйғурларниң наразилиқи барғанчә күчәймәктә икән.

Дуня уйғур қурултийи баянатчиси дилшат ришит әпәнди бу һәқтә радиомизға баянат берип, йәрлик һөкүмәт даирилириниң уйғурларни өз туралғу җайлиридин мәҗбури көчүрүш қилмиши райондики уйғурларниң хитай һөкүмитигә болған наразилиқини күчәйтип, техиму зор наразилиқ һәрикәтлири үчүн от пилтиси болидиғанлиқини агаһландурди.