Ürümchi gherbiy tagh jilghisidiki Uyghurlarni 2-qétim köchüshke mejburlishi Uyghurlarni narazi qilmaqta
2011.06.21
“Uyghurbiz” torining xewer qilishiche, eslidiki yamaliq téghining “Qarleylisi” rayoni dep atalghan mehellisidiki 1ming 720 a'ililik Uyghur 2006-yili ürümchi sheherlik hökümetning “Ürümchidiki 3 taghni güzelleshtürüsh” pilani boyiche, gherbiy tagh rayonidiki tagh jilghisigha orunlashturulghan. Eyni chaghda hökümet da'iriliri ulargha bu rayonda balilar üchün mektep, yol, meschit qatarliqlarni sélip béridighanliqini wede qilghan bolsimu, lékin hökümet da'iriliri 4 yilghiche bu wedisini orunlimighan.
Gherbiy tagh rayonigha köchürülgendin kéyin, turmushi yaxshi orunlashturulmighan bu Uyghurlarning naraziliqi erzliri dawamlishiwatqan ehwal astida, ürümchi sheherlik hökümet da'iriliri bu yil 2-ayda bu yerdiki ahalilerge, gherbiy tagh jilghisi rayonining “Chégra rayon méhmanxanisi” gha sétilip bérilgenlikini uqturghan hem ularni tagh rayonidin 2-qétim köchüshke mejburlighan. Tagh rayonidiki öz kimlikini ashkarilashni xalimighan Uyghurlarning “Uyghurbiz” tor békiti muxbirigha bildürüshiche, nöwette köchüshke mejburlan'ghan Uyghurlarning naraziliqi barghanche kücheymekte iken.
Dunya Uyghur qurultiyi bayanatchisi dilshat rishit ependi bu heqte radi'omizgha bayanat bérip, yerlik hökümet da'irilirining Uyghurlarni öz turalghu jayliridin mejburi köchürüsh qilmishi rayondiki Uyghurlarning xitay hökümitige bolghan naraziliqini kücheytip, téximu zor naraziliq heriketliri üchün ot piltisi bolidighanliqini agahlandurdi.