Xitay ma'arip ministirliqi Uyghur élining ma'arip ishlirigha mes'ul rehberlik ishxanisi qurghan

Xitay ma'arip ministirliqi yéqinda qarar chiqirip, ma'arip ministirliqi qarmiqida Uyghur élining ma'arip ishlirigha rehberlik qilidighan mexsus bir ishxana tesis qilghan.
Muxbirimiz erkin
2010-11-19
Élxet
Pikir
Share
Print

Bezi analizchilar bolsa, bu xitay merkizi hökümitining Uyghur éli ma'arip ishlirigha qol tiqishini kücheytkenlikining bishariti dep körsetmekte.

Xitay ma'arip ministirliqi tor békitining xewiridin melum bolushiche, xitay merkizi hökümitining bu yil 5‏ - ayda chaqirilghan "shinjang xizmet yighini"ning rohigha asasen qurulghan bu ishxana, Uyghur élining ma'arip ishlirini bir tutash pilanlash, yétekchilik qilish we maslashturush wezipisini atqurudiken.

Ma'arip ministirliqi partiye guruppisining sékritari yüen guyrénning biwaste rehberlikidiki mezkur ishxanining qarmiqida yene "qosh tilliq ma'arip" guruppisi, oqutquchilar qurulush guruppisi qatarliq 7 guruppa qurulghan.

Xitay ma'arip ministirliqi bu heqtiki uqturushida, shinjang ma'aripi rehberlik ishxanisining mes'uliyiti "qosh tilliq ma'arip"ni öz ichige alghan shinjang ma'aripigha munasiwetlik qurulush we mebleghni bir tutash layihilesh we orunlashturushtin ibaret ikenlikini tekitligen.

Xitay da'iriliri "shinjang ma'aripi rehberlik ishxanisi" qurup, Uyghur élining ma'arip ishlirigha biwaste rehberlik qilish qarar qilghan bu waqit, yerlik da'iriler Uyghur yesli ma'aripidin tartip aliy ma'aripqiche xitay tilini omumlashturushni küchep yolgha qoyup, 2020‏ - yilghiche Uyghur ma'arip sépide xitay tilida ders ötüshni omumlashturup bolush pilanini ijra qiliwatqan mezgilge toghra kelgen.

Xitayning radikal wastilarni qollinip, Uyghur milliy ma'arip tilini xitaychilashturush pilani nurghun Uyghurlarda endishe qozghap, chet'eldiki Uyghur teshkilatliri, xelq'ara kishilik hoquq organlirining tenqidige uchrighan idi.


Toluq bet