Шветсарийә тәрипидин хитайға қайтуруветилмәкчи болған уйғур мусапир явропа кишилик һоқуқ мәһкимисигә әрз сунди

Ниҗат абдуреһим үрүмчи шәһәрлик җ х идариси алаһидә сақчи әтритиниң хадими болуп, у буниңдин 4 йил бурун дубәй арқилиқ явропаға қечип чиққан. У алди билән италийигә келип, у йәрдин норвегийигә барған, андин йәнә италийигә қайтип кәлгән. У италийидин шветсарийигә берип, у йәрдә сиясий панаһлиқ тилигән иди.

Шветсарийә көчмәнләр идариси униң сиясий панаһлиқ тәлипини рәт қилғандин кейин, сақчи даирилири сәйшәнбә күни уни мәҗбури италийигә йолға селип қоймақчи болған. Лекин ниҗат абдуреһим адвокатиниң мәслиһәти бойичә айропиланға чиқишни рәт қилип, италийигә әвәтиветилиштин қутулған һәм явропа кишилик һоқуқ сот мәһкимисигә әрз қилған.

Ниҗат абдуреһимниң радиомизға ашкарилишичә, үрүмчи шәһәрлик җ х идарисиниң алаһидә сақчи әтритидә ишләп турған мәзгилидә, хитай әдлийә органлириниң өлүм җазаси берилип иҗра қилинған мәһбусларниң ички әзалирини суғурувелип, сатқанлиқиға даир вәқәләргә гуваһчи болған.

Униң әскәртишичә, сақчи вә әдлийә даирилири өлүм җазаси иҗра қилғанда мәһбусниң өлмәйдиған йеригә етип, униң ички әзалирини сақ елишқа тиришидикән. У, өзиниң бу хил вәқәләргә көп қетим гуваһчи болғанлиқи вә әдлийә органлириниң ички әзаларни сатидиғанлиқини билдүргән.

Әгәр ниҗат абдуреһимниң сөзи раст болса, у үрүмчидики хитай әдлийә органлириниң ички әзалар әткәсчилики билән шуғулланғанлиқини паш қилған тунҗи гуваһчи болуп қалиду.