Shwétsariye teripidin xitaygha qayturuwétilmekchi bolghan Uyghur musapir yawropa kishilik hoquq mehkimisige erz sundi

Nijat abduréhim ürümchi sheherlik j x idarisi alahide saqchi etritining xadimi bolup, u buningdin 4 yil burun dubey arqiliq yawropagha qéchip chiqqan. U aldi bilen italiyige kélip, u yerdin norwégiyige barghan, andin yene italiyige qaytip kelgen. U italiyidin shwétsariyige bérip, u yerde siyasiy panahliq tiligen idi.

Shwétsariye köchmenler idarisi uning siyasiy panahliq telipini ret qilghandin kéyin, saqchi da'iriliri seyshenbe küni uni mejburi italiyige yolgha sélip qoymaqchi bolghan. Lékin nijat abduréhim adwokatining mesliheti boyiche ayropilan'gha chiqishni ret qilip, italiyige ewetiwétilishtin qutulghan hem yawropa kishilik hoquq sot mehkimisige erz qilghan.

Nijat abduréhimning radi'omizgha ashkarilishiche, ürümchi sheherlik j x idarisining alahide saqchi etritide ishlep turghan mezgilide, xitay edliye organlirining ölüm jazasi bérilip ijra qilin'ghan mehbuslarning ichki ezalirini sughuruwélip, satqanliqigha da'ir weqelerge guwahchi bolghan.

Uning eskertishiche, saqchi we edliye da'iriliri ölüm jazasi ijra qilghanda mehbusning ölmeydighan yérige étip, uning ichki ezalirini saq élishqa tirishidiken. U, özining bu xil weqelerge köp qétim guwahchi bolghanliqi we edliye organlirining ichki ezalarni satidighanliqini bildürgen.

Eger nijat abduréhimning sözi rast bolsa, u ürümchidiki xitay edliye organlirining ichki ezalar etkeschiliki bilen shughullan'ghanliqini pash qilghan tunji guwahchi bolup qalidu.