خەۋەردە كۆرسىتىشىچە، يىغىندا خىتاي مەركىزىي ھۆكۈمىتى ئۇيغۇر ئېلىنى ھالقىما تەرەققىي قىلدۇرۇشتىكى ئىستراتېگىيىلىك پىلانىنى تۈزۈپ چىققان.
پىلاندا ئىلگىرى سۈرۈلۈشىچە، خىتاي دائىرىلىرى ئۇيغۇر ئېلىدىكى نېفىت، تەبىئىي گاز ۋە كۆمۈر قاتارلىق ساھەلەرگە ئۆزگەرتىش كىرگۈزىدىكەن، تەبىئىي گاز ۋە نېفىت ساھەسىگە مىقدار بويىچە ئەمەس بەلكى باھا بويىچە باج قويۇش تۈزۈمىنى يولغا قويىدىكەن.
مەلۇم بولۇشىچە، خىتاي دائىرىلىرى ئۇيغۇر ئېلىدە كۆمۈردىن سۇيۇق يېقىلغۇ چىقىرىش قۇرۇلۇشىغىمۇ مەبلەغ سېلىپ، بۇ ساھەنى مۇقىم تەرەققىي قىلدۇرىدىكەن.
دۇنيا ئۇيغۇر قۇرۇلتىيى باياناتچىسى دىلشات رىشىتنىڭ بىلدۈرۈشىچە، ئۇيغۇر ئېلىدىكى نېفىت-تەبىئىي گاز ساھەسى پۈتۈنلەي خىتاي ھۆكۈمىتىنىڭ ئىگىدارلىقىدا ۋە بۇ ساھەلەردىكى خىزمەتچىلەر ئاساسەن خىتاي مىللىتىدىن بولغاچقا، مەزكۇر ساھەلەرنى قانچە تەرەققىي قىلدۇرغان بىلەن، يەرلىك خەلققە پايدىسى بولمايدىكەن.