Уйғур елиниң нопуси өткән бир йилда 1.1 Пирсәнт көпәйгән

Бу хитай ахбарат васитилириниң хитай һөкүмәт статистикилирини нәқил кәлтүрүп, уйғур аптоном райони нопуси һәққидә бәргән әң йеңи мәлумати.

Хитай һөкүмити 2010‏-йили омуми йүзлүк нопус тәкшүрүши елип берип, уйғур елиниң омуми нопусини елан қилған болсиму, бирақ уйғурларниң нопус сани вә уйғур аптоном райони нопусида игиләйдиған нисбитини һазирға қәдәр елан қилмиған. Бу көзәткүчиләрниң җиддий гуманини қозғиған мәсилә болуп қалған иди.

Бирақ, “асия киндики” ториниң һөкүмәт даирилири 15‏-феврал елан қилған нопус уқтурушидин нәқил кәлтүрүп тарқатқан бу һәқтики хәвиридә, уйғурларниң хас нопус сани тилға елинмиған. Пәқәт уйғур аптоном райони омуми нопуси 2011‏-йилниң ахирлири 22 милйон 87 миңдин ешип, алдинқи йилқидин 1.1 Пирсәнт көпәйгәнлики илгири сүрүлгән.

Лекин, аптоном районлуқ иҗтимаий пәнләр академийисиниң иҗтимаий мәсилиләр тәтқиқатчиси турғунҗан нопус мәсилисидә һөкүмәтни агаһландуруп, уйғур елиниң “земини кәң байлиқи мол” болсиму, бирақ адәм яшашқа болидиған йәр земин көп әмәслики, шәһәр тәрәққият модели вә йәрниң адәм сиғдурушчанлиқиға диққәт қилиш керәкликини тәкитлигән.

Хәвәрдә илгири сүрүшичә, уйғур ели нопусиниң шәһәр-базарлишиш нисбити 5.43 Пирсәнткә йәткән. Көзәткүчиләр, шәһәр нопусиниң мутләқ көп қисми хитай көчмәнлирини асас қилидиғанлиқини билдүрмәктә.