Уйғур елидә бу йил киргәндин буян нисбәтән зор көләмлик аммиви қазаларниң йүз бериш қетим сани вә адәм өлүш әһвали зор дәриҗидә көпәйгән

Уйғур аптоном районида бу йил киргәндин буян нисбәтән зор көләмлик аммиви қазаларниң йүз бериш қетим сани вә адәм өлүш әһвали өткән йилниң охшаш мәзгилидин зор дәриҗидә көпәйгән.
Мухбиримиз әркин
2011.03.28

Лекин йәрлик мәтбуатларниң бу һәқтики хәвәрлиридә, даириләрниң мунасивәтлик органларни бу түрлүк аммиви қазаларниң алдини елишқа агаһландурғанлиқи илгири сүрүлгән болсиму, лекин буниңға немә сәвәб болуватқанлиқи тилға елинмиған.

“шинҗаң иқтисад гезити” ниң ашкарилишичә, бу йил киргәндин буян уйғур аптоном районида 23 қетим зор көләмлик аммиви қаза йүз берип, йүз бериш қетим сани 2010‏-йилниң охшаш мәзгилидин 42 % көпәйгән. юқириқи аммиви қазаларда 98 адәм өлгән болуп, өлгән адәм сани 2010‏-йилниң охшаш мәзгилидин 33% артқан.

Юқириқи аммиви қазаларниң йүз бериш қетим саниниң % 78 дин көпрәкини қатнаш вәқәлири игилигән. Өлгән адәмниң 84% дин көп қисми юқириқи қатнаш вәқәлиридә һаятидин айрилған.

Бу мунасивәт билән уйғур аптоном райони даирилири дүшәнбә күни телефон йиғини ечип, мунасивәтлик органлардин аммиви характерлик қазаларниң алдини елишни тәләп қилған.

Аптоном районниң муавин рәиси күрәш мәхсут риясәтчилик қилған бу йиғинда у, аптоном районниң адәмләр бир қәдәр көп сәпәр қилидиған бир пәсилгә киргәнликини әскәртип, бу хил вәқәләрниң йүз беришниң йәнә көпийиш еһтималлиқи барлиқини агаһландурған.

Лекин бәзи анализчилар, хитай һөкүмитиниң 5‏-июл вәқәсидин кейин уйғур илиға мәбләғ селишни күчәйтип, ичкиридики хитай көчмәнлириниң районға еқип киришини тезләткәнликини, лекин районниң қатнаш вә ишләпчиқириш бихәтәрлик асаси әслиһәлириниң буниңға пайлимай қалғанлиқини, нәтиҗидә бу районда йүз бәргән аммиви қазаларниң шиддәтлик көпийишини кәлтүрүп чиқарғанлиқини илгири сүрмәктә.

Хитай даирилириниң йеқинда җәнвәдики б д т йиғинида ашкарилишичә, бейҗиң һөкүмити кәлгүси 10 йилда уйғур илиға салидиған мәбләғни, йеқинқи 10 йилда салған мәблиғидин 10 һәссә көпәйтидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.