Dunya Uyghur qurultiyi chang chünshyenning yéqinda amérikida élip barghan ziyaritige diqqet qilghanliqini bildürdi

Jang chünshyen 5 künlük amérika sepiride amérikidiki yerlik indi'anlar olturaqlashqan rayonlarda tekshürüsh élip barghan we amérika tashqi siyaset kéngishide islam radikalizmgha da'ir doklat anglighan. Amérika tashqi siyaset kéngishidiki uchrishishta jang chünshyen'ge mezkur kéngeshning mu'awin re'isi élan bérman, istratégiyilik alaqe mutexessisi robért réyli qatarliq mutexessisler radikal islam heqqide doklat bergen.

Jang chünshyen 8-iyundin 13‏-iyun'gha qeder amérikini ziyaret qilip, amérika kéngesh palata ezaliridin rojér wéykir, mark kérk, we bénjamin kardén qatarliq kishiler bilen körüshken idi.

Lékin uning ziyariti amérika axbarat wasitiliride élan qilinmidi. Uyghur aptonom rayoni axbarat wasitiliri uning amérikini ziyaret qilghanliqini peqet u ziyaritini axirlashturup xitaygha qaytip barghandin kéyin élan qilghan. Jang chünshyen amérikidiki mezgilide bezi amérika néfit shirketlirining mes'ulliri bilen körüshüp, söhbet élip barghan we ularni Uyghur élige meblegh sélishqa ündigen.

Jang chünshyenning amérika ziyariti uning qatar, se'udi erebistan we iran ziyaritidin kéyin élip bérilghan idi. Biz uning washin'gtonda körüshken mark, kérk, rojér wéykir, bénjamin kardén qatarliq kéngesh palata ezaliri we amérika tashqi siyaset kéngishigha téléfon qilip, ehwal igileshke tirishqan bolsaqmu, lékin ulardin hazirgha qeder héchqandaq jawab kelmidi.